អត្ថបទ៖ វិចិត្រ

មានប្រជាពលរដ្ឋស្លូតត្រង់កម្ពុជាជាង១៦ម៉ឺន(១៦៨ ៩៤៦)នាក់ បានចាកចោលភូមិឋានផ្ទះសម្បែង នៅក្នុងសង្គ្រាមឈ្លានពានរបស់កងទ័ពថៃមកលើបូរណភាពទឹកដីកម្ពុជា ដែលចំនួននេះ គឺចាប់គិតពីថ្ងៃទី២៤ កក្កដា ដល់ត្រឹមម៉ោង៦ល្ងាចថ្ងៃទី២៩ ខែកក្កដា ឆ្នាំ២០២៥។ នេះបើតាមការបញ្ជាក់ពីអ្នកនាំពាក្យក្រសួងការពារជាតិកម្ពុជា ឧត្តមសេនីយ៍ឯក ម៉ាលី សុជាតា នៅថ្ងៃទី៣០ ខែកក្កដា ឆ្នាំ២០២៥។

ជនភៀសសឹកទាំងនេះមកពីខេត្តចំនួន៥ ដែលស្ថិតនៅតាមបណ្តោយបន្ទាត់ព្រំដែនកម្ពុជា-ថៃ រួមមាន ខេត្តបន្ទាយមានជ័យ ចំនួន ៣៨ ៤៤៧នាក់ ខេត្តឧត្តរមានជ័យ ចំនួន ៣៤ ២៦៤នាក់ ខេត្តព្រះវិហារ ចំនួន ២៩ ៧១៧នាក់ ខេត្តពោធិ៍សាត់ ចំនួន ៣ ០២៦នាក់ និងខេត្តសៀមរាបចំនួន ៣៣ ៤៩២នាក់។

កាលពីថ្ងៃទី២៤ ខែកក្កដា​ ឆ្នាំ២០២៥ កងយោធាថៃបានបើកការបាញ់ប្រហារមុនមកលើទាហានកម្ពុជាដែលកំពុងឈរជើងនៅតំបន់ប្រាសាទតាមាន់ធំ បន្ទាប់មកទាហានកម្ពុជាក៏បានបាញ់តដៃក្នុងន័យការពារខ្លួន ហើយក៏បានបង្កឱ្យទៅជាមានការផ្ទះអាវុធដាក់គ្នាជាលក្ខណៈទ្រង់ទ្រាយធំ។

សំឡេងអាវុធបានស្ងប់ស្ងាត់ទៅវិញទាំងស្រុង នៅត្រឹមវេលាងម៉ោង១២:០០នាទីរំលងអាទ្រាធថ្ងៃទី២៨ ឈានចូលថ្ងៃទី២៩ ខែកក្កដា ឆ្នាំ២០២៥ បន្ទាប់ពីជំនួបចរចាស្វែងរកបទឈប់បាញ់រវាងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក Phumtham Wechayachai (ភូមថាំ វីឆាយ៉ាឆ័យ) នាយករដ្ឋមន្ត្រីស្តីទីរបស់ថៃ នៅប្រទេសម៉ាឡេស៊ី ដែលមានលោក Anwar Ibrahim (អាន់វ៉ា អ៊ីប្រាហ៊ីម) នាយករដ្ឋមន្ត្រីម៉ាឡេស៊ី ដែលជាប្រធានអាស៊ានប្តូរវេន ជាសន្ធានការី។ ជំនួបនេះធ្វើឡើងដោយមានការរៀបចំពីសហរដ្ឋអាមេរិក និងមានការចូលរួមពីតំណាងរដ្ឋាភិបាលចិនផងដែរ៕