អត្ថបទ៖ កែវ រតនៈ

យោងតាមការផ្សព្វផ្សាយរបស់​បេឡាជាតិសន្តិសុខសង្គម បានឱ្យដឹងថា ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសនឹងដាក់អនុវត្តជាផ្លូវការកម្មវិធីទូរស័ព្ទដៃ NSSF Enterprise Appនៅថ្ងៃទី១ ខែតុលា ឆ្នាំ២០២៥ ឆាប់ៗខាងមុខនេះ ដើម្បីផ្ដល់ភាពងាយស្រួលដល់ម្ចាស់សហគ្រាស គ្រឹះស្ថាន និងកម្មករនិយោជិត ដែលកម្មវិធីនេះ មានមុខងារសំខាន់ៗ ដូចជា៖ ការចុះបញ្ជីកម្មករនិយោជិតដើម្បីក្លាយជាសមាជិក ប.ស.ស. ត្រួតពិនិត្យព័ត៌មានសមាជិក ប.ស.ស. ប្រកាសបង់ភាគទានប្រចាំខែមក ប.ស.ស. ពិនិត្យប្រតិបត្តិការបញ្ចូលប្រាក់សម្រាប់តម្កល់ទុកទូទាត់ភាគទានប្រចាំខែ ឬការផាកពិន័យផ្សេងៗ ព្រមទាំងពិនិត្យប្រតិបត្តិការទូទាត់នានាដែលបង់ប្រាក់រួចរាល់ផងដែរ។

នេះជាប្រសាសន៍ថ្លែងឡើងរបស់ ឯកឧត្តមប្រតិភូរាជរដ្ឋាភិបាល ក្នុងឱកាសអញ្ជើញបើកកិច្ចប្រជុំផ្ទៃក្នុងប្រចាំខែ ជាមួយថ្នាក់ដឹកនាំក្រោមឱវាទបេឡាជាតិសន្ដិសុខសង្គមដោយផ្ទាល់ និងតាមប្រព័ន្ធអនឡាញ សរុបប្រមាណជា ១៤៧រូប ដែលប្រព្រឹត្តទៅនៅសាលប្រជុំមេត្តា ស្នាក់ការកណ្ដាល ប.ស.ស. រាជធានីភ្នំពេញ។

ឯកឧត្តមប្រតិភូរាជរដ្ឋាភិបាលបានបន្ថែមថា ការអភិវឌ្ឍប្រព័ន្ធឌីជីថលនេះ ជាសមិទ្ធផលថ្មី របស់ ប.ស.ស. ដែលអាចសម្រួល និងផ្ដល់ភាពងាយស្រួល ដល់ម្ចាស់សហគ្រាស គ្រឹះស្ថាន ក្នុងការប្រកាសបង់ភាគទាន ឬការងារផ្សេងៗដែលពាក់ព័ន្ធ ប.ស.ស. ជាពិសេសសម្រួលដល់កម្មករនិយោជិត ដោយពុំចាំបាច់មកធ្វើប័ណ្ណសមាជិក ប.ស.ស. ដោយផ្ទាល់ទៀតទេ បន្ទាប់ពីចូលបម្រើការងារក្នុងសហគ្រាស គ្រឹះស្ថាន ដោយម្ចាស់សហគ្រាស អាចស្នើសុំប័ណ្ណសមាជិក ប.ស.ស. តាមរយៈកម្មវិធីទូរស័ព្ទដៃនេះជូនពួកគាត់បាន ដែលកន្លងមក ប.ស.ស. បានអភិវឌ្ឍន៍ត្រឹម Web application ប៉ុណ្ណោះ។

ឯកឧត្តមប្រតិភូរាជរដ្ឋាភិបាល បានបញ្ជាក់បន្ថែមថា បើទោះបីសហគ្រាស គ្រឹះស្ថាន អាចស្នើសុំចុះឈ្មោះបុគ្គលិកថ្មី តាមរយៈកម្មវិធីទូរស័ព្ទដៃ NSSF Enterprise App ពិតមែន ប៉ុន្ដែកម្មករនិយោជិតត្រូវមកបញ្ចូលខ្ចៅដៃនៅគ្រប់សាខា ប.ស.ស. ដែលនៅជិត យ៉ាងតិចក្នុងអំឡុងពេល ២ខែ បន្ទាប់ពីទទួលបានអនុម័តពីមន្ដ្រី ប.ស.ស. រួច ដើម្បីអាចមានសិទ្ធិប្រើប្រាស់សេវានៅមន្ទីរពេទ្យដែលជាដៃគូ ប.ស.ស. បាន។

ឯកឧត្តមប្រតិភូរាជរដ្ឋាភិបាល ក៏បានណែនាំដល់ថ្នាក់ដឹកនាំ និងមន្រ្ដីបុគ្គលិកក្រោមឱវាទទាំងអស់ត្រូវចូលរួមគោរពវិន័យ បទបញ្ជាផ្ទៃក្នុង ជាពិសេសការពង្រឹងសមត្ថភាពបន្ថែមដើម្បីអភិវឌ្ឍន៍សមិទ្ធផលថ្មីៗបន្ថែមទៀត ក្នុងការកសាងប្រព័ន្ធសន្ដិសុខសង្គម ឱ្យកាន់តែខិតជិតកម្មករនិយោជិត កាន់តែផ្ដល់ភាពងាយស្រួលដល់កម្មករនិយោជិត និងកាន់តែរីកចម្រើនបន្ថែមទៀត៕

 រូបភាព៖ ប.ស.ស.