អត្ថបទ៖ វិចិត្រ

ឯកឧត្តម ខៀវ កាញារីទ្ធ អតីតរដ្ឋមន្ត្រីក្រសួងព័ត៌មាន និងបច្ចុប្បន្នជាសមាជិករដ្ឋសភាបានលើកឡើងថា មនុស្សជាច្រើនមិនទាន់មើលឃើញពីវាសនារបស់លោក ប៊ុនស៊ីន ផាតក្លាំង មេយោធភូមិភាគទី២របស់ថៃ ខណៈអាជីពរបស់មេទ័ពរូបនេះជិតត្រូវបានបញ្ចប់នាពេលខាងមុខដ៏ខ្លី។   

តាមរយៈសំណេរនៅលើទំព័រហ្វេសប៊ុកនៅថ្ងៃទី២៨ ខែសីហានេះ ឯកឧត្តម ខៀវ កាញារីទ្ធ សរសេរថា កាលពីថ្ងៃមុន ឯកឧត្តមបាននិយាយរួចហើយគឺថៃយកសង្គ្រាមព្រំដែនដើម្បីស្តារឥទ្ធិពលកងទ័ពខ្លួនដែលធ្លាក់ចុះ តែនៅមានចំណុចមួយទៀតដែលមនុស្សជាច្រើនមិនទាន់មើលឃើញ ដែលនោះគឺអនាគតនយោបាយរបស់លោក ឃ្លាំង(ប៊ុនស៊ីន ផាតក្លាំង) មេយោធិភូមិភាគ២ ថៃ ដែលដុតរឿងរហូត។ ឯកឧត្តមបន្ថែមថា លោកឃ្លាំងដល់ពេលដែលត្រូវបញ្ចប់អាជីពរបស់ខ្លួន (ចូលនិវត្តន៍) តែលោកឃ្លាំងមានសង្ឃឹមតិចណាស់ដែលបានតំណែងជារដ្ឋមន្ត្រីមួយកន្លែងនៅក្នុងរដ្ឋាភិបាល ហេតុនេះទិសដៅធំបំផុតរបស់លោកឃ្លាំង គឺឧត្តមក្រុមប្រឹក្សាព្រះមហាក្សត្រ ដោយនៅលើកន្លែងនេះលោកឃ្លាំងមានសង្ឃឹមច្រើនបើគាត់ប្រឹងសំញេញធ្មេញជាមួយកម្ពុជា ព្រោះសមាជិកក្រុមប្រឹក្សាព្រះមហាក្សត្របច្ចុប្បន្នសុទ្ធតែចាស់ហើយរើសដោយព្រះមហាក្សត្រមុន មិនទាន់មានអ្នកណាមួយរើសដោយមហាក្សត្របច្ចុប្បន្ននេះទេ។

ក្នុងនោះឯកឧត្តមមានប្រសាសន៍ថា ព្រះមហាក្សត្របច្ចុប្បន្នជាយោធាអាជីព ហើយកាលមិនទាន់ឡើងរាជ្យព្រះអង្គត្រូវគេរិះគន់ច្រើន ហេតុនេះព្រះអង្គត្រូវបង្ហាញរូបភាពថ្មី។ ពេលនេះ អ្នកនៅជុំវិញព្រះអង្គសុទ្ធតែត្រូវបំពាក់សក្តិចូលជាយោធាទាំងអស់ ដែលជាជំហានមួយមិនមែនគ្រាន់តែបង្ហាញថា ព្រះមហាក្សត្រជាមេលើកងទ័ពទេ តែមហាក្សត្រថៃនិងកងទ័ពថៃគឺតែមួយ។ នេះជាច្រកសង្ឃឹមរបស់លោកឃ្លាំង ហើយដែលខ្ញុំតែងទូន្មានទៅបងប្អូនខ្មែរយើង កុំបង្ហោះរូបភាព ឬ និយាយអ្វីប៉ះពាល់ដល់មហាក្សត្រថៃ ព្រោះគេក៏មិនប៉ះពាល់មកលើយើងដែរ និង ដើម្បីកុំធ្លាក់ចូលអន្ទាក់ជំរុញអោយស្ថាបន័កំពូលថៃឈានដល់កម្រិតដាច់ខាត (radicalization) ជាមួយកម្ពុជា ដូចសម្តេចតេជោតែងលើកឡើងថា «កុំបិទផ្លូវឈាម»៕