អត្ថបទ៖ វិចិត្រ

ក្រសួងបរិស្ថាន បានព្រមានចាត់វិធានការផ្លូវច្បាប់ចំពោះកសិដ្ឋានចិញ្ចឹមជ្រូកសូ សាវឿន ក្នុងការណីនៅបន្តបញ្ចេញសំណល់រាវបង្កផលប៉ះពាល់ដល់បរិស្ថាន និងសុខភាពសារធារណៈ។ នេះបើតាមសេចក្តីជូនដំណឹងរបស់ក្រសួងបរិស្ថានចុះថ្ងៃទី៣ ខែកក្កដា ឆ្នាំ២០២៥ ដែលប៉តងប៉ុស្តិ៍ទើបទទួលបាននៅថ្ងៃនេះ។

តាមរយៈលិខិតជូនដំណឹងខាងលើបានលើកឡើងថា «ដើម្បីការពារប្រភពទឹកសាធារណៈ និងទប់ស្កាត់ការបំពុលទឹកប៉ះពាល់ដល់ សុខភាពសាធារណៈនិងបរិស្ថានឱ្យខាងតែបាន ក្រសួងបរិស្ថាន តម្រូវឱ្យក្រុមហ៊ុនត្រូវបញ្ឈប់ កាការបញ្ចេញសំណល់រាវចេញពីទីតាំងក្រុមហ៊ុន ជាបន្ទាន់ទោះក្នុងរូបភាព ឬក្នុងគោលបំណងណាក៏ដោយ រហូតដល់ មានការសម្រេចជាថ្មី ពីក្រសួងបរិស្ថាន។ ក្នុងករណីមិនអនុវត្តតាមការសម្រេចរបស់ក្រសួងបរិស្ថាន ក្រសួងបរិស្ថាននឹងចាត់វិធានការច្បាប់ ជាធរមានបន្ថែមទៀត។»

លិខិតដដែលបានបញ្ជាក់ថា  កសិដ្ឋានចិញ្ចឹមជ្រូក សូ សាវឿន ដែលមានអាសយដ្ឋានស្ថិតនៅភូមិកូនសត្វ ឃុំកូនសត្វ ស្រុកទឹកឈូ ខេត្តកំពត បានបង្កឱ្យមានការបំពុលទឹកសាធារណៈ និងធ្វើឱ្យប៉ះពាល់ដល់ការរស់នៅ របស់ ប្រជាពលរដ្ឋ ហើយក្រសួងបរិស្ថានបានរកឃើញ នៅថ្ងៃទី១៧ ខែមិថុនា ឆ្នាំ២០២៥ ដោយល្មើសទៅនឹង មាត្រា១៥៦ មាត្រា១៦២ មាត្រា១៦៣ នៃក្រមបរិស្ថាននិងធនធានធម្មជាតិ និងមាត្រា៦ នៃអនុក្រឹត្យលេខ២៧ ស្តីពីការត្រួតពិនិត្យការបំពុលទឹក មាត្រា៤ថ្មី និងមាត្រា៩ថ្មី នៃអនុក្រឹត្យលេខ១០៣ ស្តីពីការកែសម្រួល អនុក្រឹត្យលេខ២៧៕