អត្ថបទ៖ សំនៀង

តាមរយៈមន្ទីរបរិស្ថានរាជធានី ខេត្តទូទាំងប្រទេស នៅថ្ងៃទី៥ ខែសីហា ឆ្នាំ២០២៥ បានចែកជូនកូនឈើដល់ប្រជាពលរដ្ឋដោយឥតគិតថ្លៃ យកទៅដាំ បានចំនួន៣៩០៤២ដើម ក្នុងនោះ មានកូនត្នោត៤២៧២ ដើម កូនឈើព្រៃចំនួន ១៥៨១៥ដើម និងឈើហូបផ្លែ ៦២០៣ដើម។

ជាមួយគ្នានេះ ក្រសួងបរិស្ថាន បានបណ្តុះកូនឈើ នៅតាមថ្នាលរៀបចំដោយមន្ទីរបរិស្ថានរាជធានីខេត្តទូទាំងប្រទេស និងតាមថ្នាលបណ្តុះកូនឈើថ្នាក់តំបន់ នៅក្នុងខេត្តត្បូងឃ្មុំ សៀមរាប កោះកុង កំពង់ស្ពឺ និងមណ្ឌលគីរី បានចំនួន ៣ ៤៥៤ ៤៧២ ដើម ក្នុងនោះមាន ឈើហូបផ្លែចំនួន១៤៦ ៣៣២ ដើម, ឈើព្រៃចំនួន ១ ៩៣៣ ៧៣៦ ដើម និងកូនត្នោតចំនួន១ ៣៧៤ ៤៣៤ដើម សម្រាប់ឆ្នាំ២០២៥។

សូមបញ្ជាក់ថា ស្របតាមរដូវកាល មានភ្លៀងធ្លាក់ ក្រសួងបរិស្ថាន បានអនុវត្តយុទ្ធនាការបណ្តុះ«ពន្លកបៃតង» ដោយបានចែកកូនឈើ ចាប់ពីថ្ងៃទី៥ ខែសីហា ឆ្នាំ២០២៥ នៅតាមន្ទីរបរិស្ថានរាជធានីខេត្ត និងថ្នាលបណ្តុះកូនឈើនៅតាមតំបន់ សរុបចំនួន ៥៥ទីតាំង ក្នុងឆ្នាំ២០២៥នេះ ជូនប្រជាពលរដ្ឋដោយឥតគិតថ្លៃ យកទៅដាំជាបណ្តើរៗ។

កូនឈើទាំងនេះ ត្រូវចែកជូនប្រជាពលរដ្ឋដោយឥតគិតថ្លៃ យកទៅដាំនៅតាមទីសាធារណៈ តាមសហគមន៍ វត្តអារាម សាលារៀនជាដើម ដើម្បីបង្កើនភាពបៃតង ឆ្ពោះទៅសម្រេចបានកម្ពុជាអព្យាក្រឹតកាបូននៅឆ្នាំ២០៥០៕