អត្ថបទ៖ យូ វាសនា

យោងតាមទំព័រហ្វេសប៊ុករបស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងខែមិថុនា ឆ្នាំ​២០២៥ នេះ រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន សហការជាមួយអង្គការសត្វព្រៃ និងរុក្ខជាតិ និងសហគមន៍មូលដ្ឋាន បានរកឃើញសំបុកពងកូនក្រពើភ្នំចំនួន ០៣ ដែលមាន​ពងសរុបចំនួន ៤៣គ្រាប់ នៅឧទ្យានជាតិជួរភ្នំក្រវាញ ក្នុងឆ្នាំ២០២៥នេះ។ កាលពីឆ្នាំ២០២៤ ចំនួន​៦៥គ្រាប់​ ដែលបានញាស់ជាកូនចំនួន ៦០ក្បាល ចូលទៅក្នុងធម្មជាតិប្រកបដោយជោគជ័យ។

ក្នុងចំណោមពងសរុបចំនួន ៤៣ នេះ ពងដែលមានលទ្ធភាពបង្កកំណើតបានមានចំនួន ៣៤គ្រាប់ ដែលត្រូវបានយាមការយ៉ាងម៉ត់ចត់ពីសំណាក់មន្ត្រីជំនាញ និងសហគមន៍មូលដ្ឋាន ហើយពងទាំងនេះរំពឹងថានឹងញាស់នៅចន្លោះខែសីហាខាងមុខនេះ។

យោងតាមអង្គការ USAID Cambodia  បានឱ្យដឹងថា​ ក្រពើភ្នំ ឬ ក្រពើត្រី ត្រូវបានចុះជាប្រភេទ ជិតផុតពូជ ក្នុងបញ្ជីក្រហមរបស់អង្គការសហភាពអន្តរជាតិដើម្បីការអភិរក្សធម្មជាតិ (IUCN) ហើយបានបាត់ខ្លួនពីតំបន់ជាច្រើននៅលើពិភពលោក​ ដោយសារការបាត់បង់ទីជម្រក ការបរបាញ់ និងការជួញដូរសត្វព្រៃខុសច្បាប់។ នៅក្នុងប្រទេសកម្ពុជា ក្រពើភ្នំត្រូវបានគេជឿថាបានផុតពូជពីក្នុងព្រៃទៅហើយ រហូតដល់មានការរកឃើញឡើងវិញនៅភ្នំក្រវាញក្នងឆ្នាំ២០០០៕

រូបភាព៖ ក្រសួងកសិកម្ម