អត្ថបទ៖ វិចិត្រ

អនុប្រធានទី១អាជ្ញាធរមីនកម្ពុជា បានថ្លែងថា កម្ពុជាមានមីនគ្រប់គ្រាន់ហើយនៅលើទឹកដីរបស់ខ្លួន ដូច្នេះកម្ពុជាមិនត្រូវការមីនថ្មីណាមួយទៀតទេ ដើម្បីសម្លាប់ ឬបង្កការលំបាកដល់ប្រជាជនរបស់ខ្លួន។  

ថ្លែងនៅក្នុងសន្និសីទសារព័ត៌មាន ស្តីពី ការចោទប្រកាន់គ្មានមូលដ្ឋានរបស់ថៃ មកលើកម្ពុជា អំពីការដាក់មីនថ្មី និងជំហរកម្ពុជា ក្នុងនាមជារដ្ឋភាគី នៃអនុសញ្ញាហាមប្រាម ការប្រើប្រាស់មីនប្រឆាំងមនុស្ស (អនុសញ្ញាអូតាវ៉ា) នៅព្រឹកថ្ងៃទី១៨ ខែសីហា ឆ្នាំ២០២៥ ឯកឧត្តម លី ធុជ ទេសរដ្ឋមន្ត្រី និងជាអនុប្រធានទី១អាជ្ញាធរមីន​ មានប្រសាសន៍ថា កម្ពុជាពុំមានមីនថ្មីទេ កម្ពុជាមានតែមីនចាស់ដែលនៅក្នុងតំបន់អតីតសមរភូមិ។ កម្ពុជាធ្លាប់ជាប្រទេសដែលរងគ្រោះដោយសារមីន ដូច្នេះកម្ពុជាដឹងថាមីនវាសាហាវ ហើយនាំមកនូវគ្រោះមហន្តរាយដល់ក្រុមគ្រួសារនៅពេលមានគ្រោះថ្នាក់ដោយសារមីន។

ក្នុងនោះឯកឧត្តមក៏បានលើកឡើងដែរថាមីនគឺជាសត្រូវរបស់ប្រជាជនកម្ពុជា និងពិភពលោកទាំងមូល។ កម្ពុជាជាប្រទេសនាំមុខគេដ៏ឆ្នើមដែលបានទទួលស្គាល់ពីសហគមន៍អន្តរជាតិថាជាប្រទេសដែលបានប្រយុទ្ធប្រឆាំងនឹងមីន ហើយនិងចូលរួមជាមួយប្រទេសដទៃទៀតក្នុងការទប់ស្កាត់ និងការប្រើប្រាស់មីន ក្នុងចំណោមប្រជាជនជាង១៦០ប្រទេស​។

ឯកឧត្តម លី ធុជ លើកឡើងបន្តថា ក្នុងនាមជាប្រទេស និងជាតិសាសន៍មួយដែលរងគ្រោះដោយសារមីន ហើយនិងជាប្រទេសដែលចូលរួមចលនាប្រឆាំងនឹងការប្រើប្រាស់មីន ដើម្បីពិភពលោកមួយគ្មានមីន កម្ពុជា ចូលរួមសោកស្តែងចំពោះទាហានថៃដែលបានរងគ្រោះថ្នាក់ដោយសារគ្រាប់មីន។

ជាមួយគ្នានេះ អនុប្រធានទី១អាជ្ញាធរមីនកម្ពុជារូបនេះ បានព្រមានពីគ្រោះថ្នាក់ដោយសារគ្រាប់មីន បើទាហានថៃនៅតែបន្តដើរចូលក្នុងទឹកដីកម្ពុជា ព្រោះថាតំបន់នោះជាតំបន់អតីតសមរភូមិ ហើយពោរពេញទៅដោយគ្រាប់មីនចាស់ និងគ្រាប់មិនទាន់ផ្ទុះយ៉ាងច្រើនដែលនៅសេសសល់ ហើយកម្ពុជានឹងធ្វើការបោសសំអាតសំណល់គ្រាប់មីនចាស់ៗទាំងនោះឱ្យអស់ នៅពេលដែលប្រទេសទាំងពីរ កម្ពុជា-ថៃ ព្រមព្រៀងកំណត់ខ្សែបន្ទាត់ព្រំដែនជាក់លាក់។

ក្នុងនាមអនុប្រធានទី១អាជ្ញាធរមីន ឯកឧត្តម លី ធុជ បានអំពាវឱ្យភាគីថៃវិលមករកកិច្ចសន្ទនាតាមផ្លូវការទូតដោយសន្តិវិធី ដើម្បីដោះស្រាយបញ្ចប់នូវរាល់បញ្ហាផ្សេងៗដែលនៅសេសសល់ ហើយបើកផ្លូវឱ្យអាជ្ញាធរខាងវិស័យមីននៃប្រទេសទាំងពីរអាចធ្វើការបោសសំអាតគ្រាប់រំសេវរបស់ខ្លួននៅតាមតំបន់ដែលត្រូវការបោសសំអាត៕