អត្ថបទ៖ វិចិត្រ

រយៈពេល៥ថ្ងៃ ដែលប្រទេសថៃបានបង្កសង្គ្រាមឈ្លានពានមកលើអធិបតេយ្យរបស់ប្រទេសកម្ពុជា និងបានបង្កនូវវិនាសកម្មជាច្រើនទៅដល់កងទ័ព និងប្រជាពលរដ្ឋស្លូតត្រង់ ក្នុងនោះ ផ្ទះសម្បែង មន្ទីរពេទ្យ សាលារៀន និងវត្តអារាម ត្រូវបានបំផ្លិចបំផ្លាញដោយសារគ្រាប់ផ្លោងប្រភេទធន់ធ្ងន់របស់ថៃ។ ជាមួយគ្នានេះប្រាសាទព្រះវិហារដែលជាមត៌ករបស់កម្ពុជា ក៏ដូចជាមត៌កសម្រាប់មនុស្សជាតិផងដែរនោះ ត្រូវបានថៃទម្លាក់គ្រាប់ និងបាញ់ បណ្តាលឱ្យខូចខាតយ៉ាងដំណំជាច្រើនកន្លែងទៀតផង។

ប្រជាពលរដ្ឋស្លូតត្រង់ជាច្រើនម៉ឺននាក់បានរត់ភៀសសឹក គេចចេញពីគ្រាប់កាំភ្លើង ទៅរកទីសុវត្ថិភាព ដោយប្រឈមនឹងភាពអត់ឃ្លាន ជាពិសេសស្ត្រី និងកុមារ ជួបនឹងបញ្ហាសុខភាព និងបាត់បង់ការសិក្សា។

កិច្ចព្រមព្រៀងបទឈប់បាញ់មួយត្រូវបានធ្វើឡើងនៅក្នុងប្រទេសម៉ាឡេស៊ីរវាងថ្នាក់ដឹកនាំកំពូលនៃប្រទេសទាំងពីរកម្ពុជា-ថៃ ក្រោមការសម្របសម្រួលពីនាយករដ្ឋមន្ត្រីម៉េឡេស៊ី លោក អាន់វ៉ា អ៊ីប្រាហ៊ីម ដោយមានការជ្រោមជ្រែងពីលោក ដូណាល់ ត្រាំ ប្រធានាធិបតីសហរដ្ឋអាមេរិក និងចិនជាអ្នកសង្កេតការណ៍ផងនោះ កិច្ចព្រមព្រៀងបទឈប់បាញ់នេះបានចូលជាធរមាននៅត្រឹមវេលាម៉ោង១២:០០នាទីរំលងអធ្រាត្រថ្ងៃទី២៨ ខែកក្កដា ឆ្នាំ២០២៥ ដែលតម្រូវឱ្យឈប់បាញ ឈប់ចល័តព័ទ និងបង្កើនទ័ព។

តែយ៉ាងណាក៏ដោយទាហានថៃបានបំពានយ៉ាងគឃ្លើនលើកិច្ចព្រមព្រៀងបទឈប់បាញ់ ដោយនៅព្រឹកថ្ងៃទី២៩ ខែកក្កដា ឆ្នាំ២០២៥ ខាងភាគីទាហានថៃបានចូលមកទឹកដីកម្ពុជា ព្រមទាំងចាប់ខ្លួនយោធាកម្ពុជាចំនួន២២រូប ក្នុងនោះថៃបានបាញ់សម្លាប់ម្នាក់នៅនឹងកន្លែង និងម្នាក់បានរត់រួច។​ ហើយកាលពីថ្ងៃទី១ ខែសីហា ថៃទើបបានប្រគល់យោធិនខ្មែរចំនួន២រូបឱ្យត្រលប់មកវិញ ដោយម្នាក់មានពិការភាព និងម្នាក់ទៀតមានបញ្ហាស្មារតី នៅសល់ចំនួន១៨នាក់ផ្សេងទៀត ថៃមិនទាន់ដោះលែងឱ្យមកកម្ពុជាវិញឡើយ គិតត្រឹមថ្ងៃទី៤ ខែសីហា ឆ្នាំ២០២៥នេះ។

ជុំវិញនៃការមិនព្រមប្រគល់កងយោធិនកម្ពុជា១៨រូបមកវិញពីសំណាក់ប្រទេសថៃ សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចប្បន្នជាប្រធានព្រឹទ្ធសភាកម្ពុជា បានឱ្យដឹងថា កម្ពុជាអាចនឹងជំរុញស្នើទៅកាកបាទក្រហមអន្តរជាតិ ដើម្បីឱ្យមានការដោះលែងយោធិនកម្ពុជាមកវិញ។

តាមរយៈសំណេរនៅលើទំព័រហ្វេសប៊ុក នៅថ្ងៃទី៤ ខែសីហានេះ សម្តេចតេជោ ហ៊ុន សែន អតីនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភាកម្ពុជាបានលើកឡើងថា សម្តេច បានពិភាក្សាជាមួយនាយករដ្ឋមន្ត្រី ដើម្បីជំរុញការស្នើសុំទៅកាកបាទក្រហមអន្តរជាតិ ដើម្បីបំពេញតួនាទីទាក់ទងដល់កងទ័ពកម្ពុជា១៨រូប ដែលថៃចល័តទ័ពចូលមកចាប់ក្នុងបន្ទាយនៃកងទ័ពកម្ពុជា ក្រោយកិច្ចព្រមព្រៀងឈប់បាញ់ចូលជាធរមានរយៈពេលប្រមាណ៨ម៉ោង ដែលជាការបំពានលើកិច្ចព្រមព្រៀងឈប់បាញ់ ដែលហាមបាញ់ ហាមចល័តកងទ័ព និងហាមបន្ថែមកងទ័ព។

ក្នុងនោះសម្តេចតេជោ ក៏បានចោទជាសំណួរទៅកាន់ភាគីថៃថា ហេតុផលអ្វីទៅដែលថៃមិនព្រមប្រគល់កងទ័ពកម្ពុជា១៨រូបមកឲ្យកម្ពុជាវិញ?