អត្ថបទ៖ វិចិត្រ

នៅក្នុងទំព័រហ្វេសប៊ុករបស់ក្រសួងការពារជាតិកម្ពុជា នៅថ្ងៃទី៣ ខែសីហា ឆ្នាំ២០២៥ បានលើកឡើងថា ថ្មីៗនេះថៃបានផ្សព្វផ្សាយព័ត៌មានមួយចំនួន ដោយបានយករូបភាព វីដេអូក្លែងក្លាយ មកធ្វើការអត្ថាធិប្បាយ និងបកស្រាយជាខ្លឹមសារបំភ្លៃ មិនពិត លាបពណ៌ ថាដ្រូននោះជារបស់កម្ពុជា បានហោះចូលក្នុងទឹកដីថៃ។ ជុំវិញការចោទប្រកាន់នេះ អ្នកនាំពាក្យក្រសួងការពារជាតិកម្ពុជា ឧត្តមសេនីយ៍ឯក ម៉ាលី សុជាតា ប្រកាសច្រានចោល ចំពោះការផ្សព្វផ្សាយដោយគ្មានមូលដ្ឋាន និងផ្ទុយពីការពិតរបស់សារព័ត៌មានថៃមួយចំនួន។

អ្នកនាំពាក្យរូបនេះ ក៏បានចាត់ទុក ទង្វើទាំងអស់នេះមិនត្រឹមតែមិនបានចូលរួមចំណែកដល់ការរក្សាស្ថានភាពឱ្យមានភាពប្រសើរឡើងប៉ុណ្ណោះទេ ប៉ុន្តែវាបានបង្កឱ្យមានការកើនឡើងកម្តៅដោយមិនចាំបាច់ និងទទូចឱ្យពួកសារព័ត៌មានថៃទាំងនោះបញ្ឈប់ជាបន្ទាន់នូវទង្វើទាំងនោះ។

ជាមួយគ្នានេះ កម្ពុជាក៏អំពាវនាវឱ្យភាគីថៃចៀសវាងការបង្ហោះដ្រូនរបស់ខ្លួន ចូលក្នុងដែនអាកាសរបស់កម្ពុជាទៀត ហើយយើងក៏នឹងមានវិធានការឆ្លើយតបសមស្របចំពោះសកម្មភាពរំលោភបំពានទាំងអស់នេះផងដែរ៕