អត្ថបទ៖ កែវ រតនៈ

ខណៈដែលបទឈប់បាញ់បានចូលជាធរមានកាលនៅម៉ោង ១២យប់ថ្ងៃទី២៨ ខែកក្កដាកន្លងទៅ ការ​បាញ់ តបតគ្នារវាងកម្ពុជា និងថៃក៏បានស្ងប់​ស្ងាត់ តែអ្វីដែលនៅសល់នោះគឺគ្រាប់កាំភ្លើង និងគ្រាប់ដែលបានធ្លាក់​នៅលើទឹកដីកម្ពុជានៅតែជាហានិភ័យ។

ឯកឧត្តម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជាហៅកាត់ CMAC  បានប្រាប់បៃតង​បុស្តិ៍ថា បន្ទាប់ពីមានការផ្ទុះអាវុធ CMAC  បានចុះអប់រំដល់ប្រជាពលរដ្ឋជាជនភៀសសឹកដល់កន្លែងដែលគាត់រស់នៅឱ្យបានដឹងពីមីន  និងបានស្រាវជ្រាវ វាយតម្លៃតំបន់រងផលប៉ះពាល់ហើយបានត្រៀមមន្ត្រីជំនាញចំនួន៣៥ក្រុមដែលក្នុងមួយក្រុមមានគ្នា ៧នាក់ សម្រាប់ខេត្តឧត្តរមានជ័យ និងខេត្តព្រះវិហារដើម្បីដោះគ្រាប់មិនទាន់ផ្ទុះចេញ។ ឯកឧត្តមបន្តថា ក្នុងជំហានដំបូងនេះគឺ CMAC  បានរកឃើញគ្រាប់​ប្រភេទ MK84 ចំនួន១គ្រប់ នៅក្នុងភូមិថ្មដូន ឃុំគោកមន ស្រុកបន្ទាយអំពិល ខេត្ត​ឧត្ដរមានជ័យ ប៉ុន្តែមន្ត្រីជំនាញ CMAC  មិនទាន់បានយកចេញពីកន្លែងដែលរកឃើញនោះនៅឡើយទេ។ ជាមួយគ្នានេះឯកឧត្តមក៏បានបញ្ជាក់ថា CMAC  ក៏រកឃើញរន្ធគ្រាប់ដែលមិនទាន់ផ្ទុះនៅ៥ទីតាំងផ្សេងទៀត ។

យ៉ាងនេះក្តីឯកឧត្តម ហេង រតនា បញ្ជាក់ថា ប្រតិបត្តិការស្វែងរកគ្រាប់មិនទាន់ផ្ទុះនេះគឺធ្វើនៅតែតំបន់ណាដែលបន្ទាន់ពោលគឺតំបន់ដែលប្រជាពលរដ្ឋបានជួបប្រទេះ និងហៅមន្ត្រីជំនាញទៅពិនិត្យប៉ុណ្ណោះ ដោយរងចាំឱ្យប្រាកដកថាមិនមានការបាញ់ប្រហារគ្នាទៀត នោះ CMAC   នឹងធ្វើការងារដោយពេញលេញ។

សង្គ្រាមឈ្លានពានដែលកើតចេញពីការបាញ់៦គ្រាប់ដំបូងរបស់ទាហានថៃ បានកើតឡើងចាប់ពីព្រឹកថ្ងៃទី២៤ ខែកក្កដា រហូតដល់ ម៉ោង១២យប់ថ្ងៃទី២៨ ខែកក្កដា ឆ្នាំ ២០២៥។ ការបាញ់ប្រហារគ្នានេះបានធ្វើឱ្យគ្រាប់មិនទាន់ផ្ទុះដែលមានទាំងគ្រាប់បែកចង្កោមផងនោះបានរាយប៉ាយនៅជា​ច្រើនកន្លែងនៅតាមបណ្ដោយព្រំដែនកម្ពុជា-ថៃដែលមានជម្លោះ៕

រូបភាព៖ CMAC