អត្ថបទ៖ សំនៀង

នាឱកាសប្រគល់ប័ណ្ណសម្គាល់អចលនវត្ថុចំនួនជាង១ពាន់ប័ណ្ណនៅថ្ងៃទី២១ ខែ សីហា ឆ្នាំ២០២៥នេះ  ឯកឧត្តម វ៉ី សំណាង​អភិបាលនៃគណៈអភិបាលខេត្តតាកែវ  បានលើកឡើងពីការប្រឹងប្រែងរបស់រាជរដ្ឋាភិបាល អាជ្ញាធរខេត្ត ជាពិសេសមន្រ្តីជំនាញសូរិយោដី ក្នុងការចុះមកវាស់វែងដីធ្លីធ្វើប្លង់កម្មសិទ្ធជូនប្រជាពលរដ្ឋ ដើម្បីឱ្យប្រជាពលរដ្ឋមានភាពកក់ក្តៅលើការគ្រប់គ្រង់ដីធ្លីរបស់ខ្លួន ក៏ដូចជាបង្កលក្ខណៈងាយស្រួលដល់ប្រជាពលរដ្ឋយកទៅប្រើប្រាស់ លើការប្រកបអាជីវកម្មផ្សេងៗ តាមតម្រូវការចាំបាច់ ឬក៏អាចធ្វើប្រទានកម្មដល់កូនចៅផងដែរ។

ឯកឧត្តមបន្តថា ការផ្ដល់ប្លង់កម្មសិទ្ធិនេះ ក៏ជួយកាត់បន្ថយជម្លោះរឿងដីធ្លីបានមួយកម្រិតផងដែរ ដូច្នេះសូម​ប្រជាពលរដ្ឋដែលទទួលបានប្លង់រឹងទាំងនោះ ត្រូវថែរក្សាការពារឱ្យបានល្អ ព្រោះថាការធានាបាននូវភាពកក់ក្តៅ សុវត្ថិភាព និងសិទ្ធិកាន់កាប់ដីធ្លីពេញលេញ និងចៀសវាងនូវការរំលោភបំពានលើដីធ្លីរបស់ខ្លួន។ ពាក់ព័ន្ធការដាក់បញ្ចាំប័ណ្ណកម្មសិទ្ធដើម្បីយកប្រាក់ទៅបង្កើនមុខរបប ឯកឧត្តម អភិបាលខេត្តតាកែវ បានស្នើឱ្យប្រជាពលរដ្ឋពិចារណាឱ្យបានច្បាស់លាស់ ចៀសវាងមានបញ្ហានៅពេលសងត្រលប់ទៅវិញ។

 បើយោងតាម លោក នួន សុធា ប្រធានមន្ទីររៀបចំដែនដីនគរូបនីយកម្មសំណង់ និងសូរិយោដីខេត្តតាកែវ ប័ណ្ណសម្គាល់ម្ចាស់អចលនវត្ថុចំនួន១៤០៣ប័ណ្ណ ត្រូវបានប្រគល់ជូនប្រជាពលរដ្ឋចំនួន៣១៨គ្រួសារនៅក្នុងភូមិស្លា ឃុំតាអូរ ស្រុកគីរីវង់។ ប័ណ្ណកម្មសិទ្ធិនេះ គឺជាឯកសារដ៏មានសារៈសំខាន់ ជាឯកសារតំណាងឱ្យទ្រព្យសម្បត្តិរបស់ប្រជាពលរដ្ឋ ជាឯកសារតំណាងឱ្យកម្មសិទ្ធិផ្ដាច់មុខ ៕

រូ​បភាព៖ មន្ទីរព័ត៌មានខេត្តតាកែវ