អត្ថបទ៖ យូ វាសនា

យោងតាមការចុះផ្សាយរបស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នារសៀលថ្ងៃទី២៦​ ខែឧសភា​ ឆ្នាំ២០២៥ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំគណៈ  ប្រតិភូ​ក្រសួងអញ្ជើញចូលរួមកិច្ចប្រជុំពិនិត្យ​ពិភាក្សាលើការងារចុះបញ្ជីដីរដ្ឋនៅតំបន់បឹងទន្លេសាប ក្រោមអធិបតីភាពដ៏ខ្ពង់ខ្ពស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។

កិច្ចប្រជុំនៅទីស្តីការក្រសួងរៀបចំដែនដី នគរូបនីយកម្ម និងសំណង់នេះ​ ក៏មានការអញ្ជើញចូលរួមពីឯកឧត្តម​ ថោ​ ជេដ្ឋា​ រដ្ឋមន្ត្រីក្រសួង​ធនធានទឹក​ និងឧតុនិយម​ តំណាងក្រសួងបរិស្ថាន​ អភិបាល​និងអភិបាល​​រង​​នៃបណ្តាខេត្តជុំវិញបឹងទន្លេសាប​ និងតំណាងស្ថាប័នពាក់ព័ន្ធដទៃទៀតផងដែរ។

តាមរយ:កិច្ចប្រជុំនេះ​ ថ្នាក់ដឹកនាំក្រសួង-ស្ថាប័ននានាបានឯកភាព​គាំទ្រការចុះបញ្ជីដីរដ្ឋ​ឱ្យបានឆាប់រហ័ស​ ដើម្បីការពារបឹងទន្លេសាប​ដែលជាសម្បត្តិជាតិ​ និងប្រភពសេដ្ឋកិច្ចដ៏មហាសាល។

ខេត្តដែលជាប់បឹងទន្លេសាបមានចំនួន៦ រួមមាន ខេត្តបាត់ដំបង ពោធិ៍សាត់ កំពង់ឆ្នាំង កំពង់ធំ បន្ទាយមានជ័យ និងសៀមរាប។ តំបន់ជុំវិញបឹងទន្លេសាបត្រូវបានបែងចែកជាបីគឺ៖ តំបន់១ ជាតំបន់លំនៅដ្ឋាន និងស្រែចំការរបស់ប្រជាពលរដ្ឋ តំបន់២ ជាតំបន់ប្រើប្រាស់អាស្រ័យផល និងរក្សាទុកជាតំបន់ទ្រនាប់ការពារ និង តំបន់ ៣ ជាតំបន់ដែនព្រៃលិចទឹក ហាមឃាត់ដាច់ខាត៕

រូបភាព៖ ក្រសួងកសិកម្ម