ដោយ៖ វិចិត្រ

នៅទីបំផុតជនសង្ស័យឈ្មោះ ស៊ីវ ជ័យសិដ្ឋ ដែលបានបើរថយន្តបង្កគ្រោះថ្នាក់ចរាចរណ៍ បណ្តាលឱ្យមានជនរងគ្រោះស្លាប់ចំនួន៦នាក់ ក្នុងនោះមានទាំងទារកក្នុងផ្ទៃម្នាក់ផងនោះ ត្រូវ បានចូលខ្លួនទៅបំភ្លឺអំពីហេតុការណ៍នេះនៅស្នងការដ្ឋាននគរបាលខេត្តបាត់ដំបងតាមការកោះហៅរបស់សមត្ថកិច្ច ដោយមានកិច្ចសហការពីសំណាក់ក្រុមគ្រួសារជនសង្ស័យ។ ក្រោយ ធ្វើការសាកសួរពីសំណាក់សមត្ថកិច្ចជនសង្ស័យខាងលើនេះបានឆ្លើយសារភាពថាខ្លួនពិតជាអ្នកបើករថយន្តបង្កគ្រោះថ្នាកចរាចរណ៍បណ្តាលឱ្យមានជនរងគ្រោះស្លាប់ និងរបួសពិតមែន។  

តាមរយៈសេចក្តីប្រកាសព័ត៌មានលើកទី២នៅថ្ងៃទី១ ខែមេសា ឆ្នាំ២០២៦ នេះ អ្នកនពាក្យនៃ ស្នងការដ្ឋាននគរបាលខេត្តបាត់ដំបងបានបញ្ជាក់ថា ដោយបានការសហការពីក្រុមគ្រួសារ របស់ជនសង្ស័យឈ្មោះ ស៊ីវ ជ័យសិដ្ឋ ជាមួយសមត្ថកិច្ចនគរបាល នាវេលាម៉ោង១៥ និង៤៥ នាទីរសៀលថ្ងៃទី១ ខែមេសា ឆ្នាំ២០២៦ នេះ ពួកគាត់បាននាំកូនខ្លួនឈ្មោះ ស៊ីវ ជ័យសិដ្ឋ មក ប្រគល់ឱ្យសមត្ថកិច្ចនៃស្នងការដ្ឋាននគរបាលខេត្តបាត់ដំបង ដើម្បីធ្វើការសាកសួរពីគ្រោះថ្នាក់ ចរាចរណ៍លើផ្លូវជាតិលេខ៥ ចំណុចភូមិកោះ ឃុំកោះ ស្រុកមោងឫស្សី ខេត្តបាត់បង បណ្តាល ឱ្យជនរងគ្រោះចំនួន៥នាក់។ ក្រោយធ្វើការសាកសួរជនសង្ស័យបានឆ្លើយសារភាពថា រូបគេ តែម្នាក់គត់ដែលបានបើករថយន្តបង្កគ្រោះថ្នាក់បណ្តាលឱ្យស្លាប់ និងរបួសជនរងគ្រោះ។

ស្នងការដ្ឋាននគរបាលខេត្តបាត់ដំប​ង បានធ្វើការកោះហៅ​ជនសង្ស័យ​​ឈ្មោះ ស៊ីវ ជ័យសិដ្ឋ ឱ្យចូលខ្លួនទៅឆ្លើយបំភ្លឺករណីគ្រោះថ្នាក់ចរាចរណ៍​នៅ​ថ្ងៃ​ទី២៧ ខែមីនា ឆ្នាំ២០២៦ ត្រង់ចំណុច​ភូមិ​កោះ ឃុំកោះ ស្រុកមោងឫស្សី ខេត្តបាត់ដំបង នៅថ្ងៃ​ទី១ ខែមេសា ឆ្នាំ២០២៦។

កាលពីថ្ងទី២៧​ ខែមីនា ឆ្នាំ២០២៦ មានករណីគ្រោះថ្នាក់ចរាចរណ៍ដ៏រន្ធត់មួយ បានកើតឡើង​នៅ​លើផ្លូវជាតិលេខ៥ ត្រង់ចំណុចស្រុកមោងឬស្សី ខេត្តបាត់ដំបង បានបង្កឡើងដោយរថយន្ត MERCEDES សេរីទំនើបមួយគ្រឿង ដែលមានផ្លាកលេខ C.S.168 បណ្តាលឱ្យស្លាប់មនុស្ស​ប្រុស ស្រី ចាស់ ក្មេង សរុបចំនួន ៦នាក់ ក្នុងនោះរាប់ទាំងទារកម្នាក់នៅក្នុងផ្ទៃផងដែរ៕