អត្ថបទ៖ សំនៀង

ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមានការចូលរួមពីលោក អ៊ឹម សុភឿន អនុប្រធានមន្ទីរកសិកម្មរុក្ខាប្រមាញ់ និងនេសាទខេត្តប៉ៃលិន និងមន្ត្រីជំនាញ បានអញ្ជើញចុះពិនិត្យពីសក្តានុពល និងពិគ្រោះយោបល់ ដើម្បីផ្សព្វផ្សាយពីការបង្កើតសហគមន៍កសិកម្មទំនើបស្វាយចន្ទី នៅខេត្តប៉ៃលិន កាលពីថ្ងៃទី២៥ ខែមេសា ឆ្នាំ២០២៥ កន្លងទៅនេះ។

ជាមួយគ្នានេះ ឯកឧត្តមអនុរដ្ឋលេខាធិការ បានជួបពិភាក្សាជាមួយអាជីវករប្រមូលទិញគ្រាប់ស្វាយចន្ទី ចំនួន២កន្លែងដែលស្ថិតនៅ សង្កាត់អូតាវ៉ៅ ក្រុងប៉ៃលិន ខេត្តប៉ៃលិន។ ឯកឧត្តមបានលើកឡើងថា​ ជាទូទៅ អាជីវករប្រមូលទិញគ្រាប់ស្វាយចន្ទីបានចំនួន៤៥០-៥០០តោន ក្នុងមួយថ្ងៃ ដោយតម្លៃគ្រាប់សើម ៥៥៥០៛ក្នុងមួយគីឡូក្រាម ហើយចន្ទីនៅប៉ៃលិននេះ មានគុណភាណល្អ អត្រាសាច់ ២៧%-៣០%. ១០៥-១១០គ្រាប់ក្នុងមួយគីឡូក្រាម។

ឯកឧត្តមអនុរដ្ឋលេខាធិការ បានគូសបញ្ជាក់ថា គ្រាប់ស្វាយចន្ទីទាំងនេះ ប្រមូលទិញក្នុងខេត្តប៉ៃលិន បាត់ដំបង ពោធិ៍សាត់ និងខេត្តបន្ទាយមានជ័យ និងរៀបចំលក់បន្តទៅខេត្តកំពង់ចាម និងប្រទេសវៀតណាម។

ឆ្លៀតក្នុងឱកាសនេះដែរ ឯកឧត្តមអនុរដ្ឋលេខាធិការ ក៏បានស្នើសុំដល់អ្នកប្រមូលទិញគ្រាប់ស្វាយចន្ទីទាំងអស់ សូមជួយផ្សព្វផ្សាយបន្តអំពីអត្ថប្រយោជន៍នៃការចងក្រងបង្កើតសហគមន៍ទំនើបដំណាំស្វាយចន្ទីជូនដល់កសិករដែលដាំដុះដំណាំស្វាយចន្ទីរផងដែរ។

យោងតាមរបាយការណ៍របស់ ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា គិតត្រឹមខែមីនា ឆ្នាំ២០២៥ មានសហគមន៍កសិកម្មទំនើបចំនួន១០ ហើយ ដែលត្រូវបានបង្កើតឡើងនៅកម្ពុជា ដោយសហគមន៍ទាំងនោះផ្តោតលើដំណាំយុទ្ធសាស្រ្តចំនួន៤ គឺដំណាំស្រូវ បន្លែ ស្វាយចន្ទី និងម្រេច។ លើសពីនេះក្រសួងកសិកម្ម ក៏មានផែនការពង្រើកសហគមន៍កសិកម្មទំនើបចំនួន១០បន្ថែមទៀត នៅក្នុងឆ្នាំ២០២៥ នេះ ទៅលើដំណាំយុទ្ធសាស្រ្តដែលមានស្រាប់៕