អត្ថបទៈយូ វាសនា

ថ្លែងក្នុងឱកាសអញ្ជើញចូលរួម ក្នុងពិធីបើកកិច្ចប្រជុំគណៈកម្មាធិការសមាជរដ្ឋសភា និងព្រឹទ្ធសភា នាព្រឹកថ្ងៃទី២ ខែមិថុនា ឆ្នាំ២០២៥នេះ សម្តេចធិបតី ហ៊ុន ម៉ាណែត បានគូសបញ្ជាក់ថា តាមរយៈកម្មវិធី​គោល​នយោ​បាយទី២ រាជរដ្ឋាភិបាល បានដាក់ឱ្យដំណើរការកម្មវិធីជាតិជំនួយសង្គម ផ្នែកបណ្តុះបណ្តាលជំនាញវិជ្ជាជីវៈ និងបច្ចេកទេស សម្រាប់យុវជនមកពីគ្រួសារក្រីគ្រ ​និងគ្រួសារងាយរងហានិភ័យ នៅក្នុងគោលបំណងផ្តល់​​ឱកាសស្នើគ្នា ជូនយុវជនគោលដៅ នៅក្នុងការទទួលបានអភិវឌ្ឍជំនាញ និងឱកាសការងារកាន់តែប្រសើរ ក្នុងការបង្កើនប្រាក់ចំណូល និងជីវភាពរស់នៅតាមរយៈការផ្តល់ការបណ្តុះបណ្តាល ដោយមិនបង់ថ្លៃ ជាមួយ​នឹងប្រាក់ឧបត្ថម្ភប្រចាំខែ នៅក្នុងអំឡុងពេលទទួលការបណ្តុះបណ្តាល ក្នុងនោះកម្មវិធីនេះបានផ្តោតលើការបណ្តុះបណ្តាលជំនាញវិជ្ជាជីវៈដូនតា ក្នុងគោលបំណងចូលរួមលើកស្ទួយនិងថែរក្សាជំនាញ ទាំងនោះមិនឱ្យបាត់បង់ ជាវឌ្ឍនភាព គិតត្រឹមខែមេសា ឆ្នាំ២០២៥ យុវជនក៏បានចុះឈ្មោះចូលរៀនសរុប ជាង១១​ម៉ឺន​នាក់ នៅក្នុងនោះយុវជនមកពីគ្រួសារក្រីក្រ ងាយរងហានិភ័យ មានចំនួនជាង៤ម៉ឺននាក់ ដោយក្នុងនោះ​​យុវជនចំនួន១ម៉ឺន៣ពាន់នាក់ បានបញ្ចប់ការសិក្សា ។

សម្តេចនាយករដ្ឋមន្ត្រី បានថ្លែងបនែ្ថមថា តាមរយៈកម្មវិធីគោលនយោបាយទី៣ រាជរដ្ឋាភិបាល បានផ្តោតជាពិសេស លើការធ្វើស្ថាបនូបនីយកម្មវិធីជាតិជំនួយសង្គម ដែលមានលក្ខណៈគ្រប់ជ្រុងជ្រោយ  ដើម្បីបង្កើនសមត្ថភាព ប្រព័ន្ធគាំពារសង្គម ក្នុងការឆ្លើយតប និងវិប្បត្តិ ឬគ្រោះអាសន្ននានា តាមរយៈការរៀបចំ និងការដាក់ឱ្យអនុវត្តនូវ ទី១ គោលការណ៍ណែនាំ ស្តីពីក្របខណ្ឌកម្មវិធីជាតិ ចំនួយសង្គមក្នុងកញ្ចប់គ្រួសារ និងសម្រាប់អនុវត្តកម្មវិធីជំនួយសង្គម ក្នុងកញ្ចប់គ្រួសារ, និងទី២គោលការណ៍ណែនាំ ស្តីពីក្របខ័ណ្ឌកិច្ចគាំពារសង្គម ឆ្លើយតបទៅនឹងគ្រោះអាសន្ន ក្នុងគោលបំណងធ្វើស្ថាបនូបនីយកម្ម ​ប្រព័ន្ធគាំពារសង្គម ដើម្បីត្រៀមខ្លួនឆ្លើយតបនិងគ្រោះអាសន្ន និងវិប្បត្តិនានា ក្នុងនោះរួមមាន ទី១វិប្បត្តិគ្រោះធម្មជាតិ, ទី២ វិប្បត្តិសុខភាពសាធារណៈជាដើម ៕