អត្ថបទ៖ វិចិត្រ

ឯកឧត្តម តូច ប៊ុនហួរ រដ្ឋលេខាធិការក្រសួង​កសិកម្ម រុក្ខាប្រមាញ់ និងនេសាទ ថ្លែងថា គិតត្រឹមថ្ងៃ១៨ ខែមិថុនា ឆ្នាំ២០២៥ មានខេត្តចំនួន៥ ដែលកំពុង​ទទួលរងផលប៉ះពាល់ដោយសារគ្រោះ​ជំនន់ទឹកភ្លៀង គឺ ខេត្តតាកែវ ព្រះវិហារ កំពង់ធំ ពោធិ៍សាត់ និងខេត្តបន្ទាយមានជ័យ។ ឯកឧត្តមបន្តថា ក្នុងនោះមានខេត្តចំនួនពីរដែលបានរងផលខូចខាតខ្លាំងទៅលើដំណាំស្រូវ ដែលមានផ្ទៃដីខូចខាតសរុបចំនួន ៩២៧ ហិកតា រួមមានខេត្តកំពង់ធំខូចខាតចំនួន ៨១៣ ហិកតា និងខេត្តបន្ទាយមានជ័យខូចខាតចំនួន ១១៤ ហិកតា។

ជាមួយគ្នានេះ ឯកឧត្តមរដ្ឋលេខាធិការ បានគូសបញ្ជាក់ថា តាមការពិនិត្យ និងវាយតម្លៃនៅខេត្តកំពង់ធំ ផ្ទៃដីដែលទទួលរងផលប៉ះពាល់ដំណាំស្រូវសរុប ២ ២១០ ហិកតា ស្មើនឹង ២ ០៨២ គ្រួសារ  ក្នុងស្រុកចំនួន៥ ដែលស្រុកទាំងនោះរួមមាន ស្រុកប្រាសាទសំបូរ មាន៥ឃុំ ដែលប៉ះពាល់ដំណាំស្រូវសរុបចំនួន ៤៨៧ ហិកតា ស្រុកកំពង់ស្វាយ មាន៧ឃុំ ដែលប៉ះពាល់ដំណាំស្រូវសរុបចំនួន ១ ១៦៦ ហិកតា ស្រុកសណ្តាន់ មាន២ឃុំ ដែលប៉ះពាល់ដំណាំស្រូវសរុបចំនួន ២២៩ ហិកតា ស្រុកស្ទោង មាន៥ឃុំ ដែលប៉ះពាល់ដំណាំស្រូវសរុបចំនួន ១៤៦ ហិកតា និងស្រុកសន្ទុក មាន១ឃុំ គឺឃុំត្បូងក្រពើ ដែលប៉ះពាល់ដំណាំស្រូវចំនួន ១៨២ ហិកតា។

ឯកឧត្តម តូច ប៊ុនហួរ​ បញ្ជាក់បន្ថែមថា ស្រូវដែលរងផលប៉ះពាល់ដោយជំនន់ទឹកភ្លៀងដើមរដូវវស្សានេះ ជាប្រភេទស្រូវស្រាលមិនប្រកាន់រដូវ ហើយស្រែភាគច្រើនធ្វើក្នុងអាងស្តុកទឹក និងបឹងធម្មជាតិ ដោយបានដាំដុះតាំងពីចុងខែមីនា និងខែមេសា។ ឯកឧត្តមបន្ថែមទៀតថា រដូវវស្សាឆ្នាំនេះមានភ្លៀងធ្លាក់ច្រើន ជាពិសេសភ្លៀងបានចាប់តាំងពីខែមេសា ទឹកបឹងកើនឡើងលឿន បណ្តាលឱ្យលិចលង់ស្រូវដំណាក់កាលដាក់គ្រាប់ និងមួយចំនួនបានទុំ ត្រៀមនឹងប្រមូលផល ប៉ុន្តែការលិចលង់មានរយៈពេលយូរថ្ងៃពេក បណ្តាលឱ្យមានការខូចខាតច្រើន៕