អត្ថបទ៖ កែវ រតនៈ

ឯកឧត្តម កត្តា អ៊ន រដ្ឋលេខាធិការ និងជាប្រធានក្រុមការងារឆ្លើយតប និងផ្ដល់ព័ត៌មានពាក់ព័ន្ធនឹងសេវាសាធារណៈ របស់ក្រសួងការងារ និងបណ្ដុះបណ្ដាលវិជ្ជាជីវៈនារសៀលថ្ងៃទី១១ ខែមីនា ឆ្នាំ២០២៥នេះ បានអញ្ជើញបើកកិច្ចប្រជុំបូកសរុបលទ្ធផលការងារសម្រេចបានប្រចាំខែកុម្ភៈ និងលើកទិសដៅការងារអនុវត្តបន្តសម្រាប់ខែមីនា ដែលប្រព្រឹត្តទៅនៅសាលប្រជុំនាយកដ្ឋាន ស.អ ស្នាក់ការកណ្ដាល ប.ស.ស. រាជធានីភ្នំពេញ ដោយមានអ្នកចូលរួមប្រមាណជា ៣០រូប។

នៅក្នុងកិច្ចប្រជុំប្រចាំខែនេះ ឯកឧត្តមប្រធានក្រុមការងារ បានជំរុញឱ្យមានការរៀបចំសិក្ខាសាលាដើម្បីចែករំលែកបទពិសោធន៍ ចំណេះដឹងថ្មីៗ ពីអង្គភាពក្រោមឱវាទក្រសួងការងារ និងបណ្ដុះបណ្ដាលវិជ្ជាជីវៈ ដល់ក្រុមប្រតិបត្តិការផ្ដល់ព័ត៌មាន ដើម្បីទទួលបានចំណេះដឹងថ្មីៗ ដែលអាចបំពេញបន្ថែមនូវចំណុចខ្វះខាត។

ឯកឧត្តមប្រធានក្រុមការងារ ក៏បានលើកទឹកចិត្តដល់មន្ត្រី បុគ្គលិកនៃក្រុមការងារ បន្តអនុវត្តតួនាទីភារកិច្ចរបស់ខ្លួនធ្វើយ៉ាងណាដោះស្រាយរាល់បញ្ហាប្រឈមក្នុងការឆ្លើយតបចម្ងល់របស់បងប្អូនប្រជាពលរដ្ឋ ជាពិសេសបងប្អូនកម្មករនិយោជិត ឱ្យទាន់ពេលវេលា និងមានប្រសិទ្ធភាពខ្ពស់ ទាក់ទងនឹងវិស័យការងារ សន្ដិសុខសង្គម និងបណ្ដុះបណ្ដាលវិជ្ជាជីវៈ ឱ្យបានរហ័ស ច្បាស់លាស់ និងក្រមសីលធម៍ប្រកបដោយភាពទន់ភ្លន់ និងភាពអត់ធ្មត់ជាសំខាន់៕

 រូបភាព៖ ប.ស.ស.