ដោយ៖ កែវ រតនៈ

តាមការចេញផ្សាយនៅថ្ងៃទី ២៧ ខែមករា ឆ្នាំ២០២៦ របស់ គណៈកម្មាធិការជាតិគ្រប់គ្រងគ្រោះមហន្តរាយ (NCDM) បានរាយការណ៍ថា    រាជរដ្ឋាភិបាលកម្ពុជាកំពុងរៀបចំលំនៅដ្ឋានបណ្តោះអាសន្នសម្រាប់ជនភៀសសឹកដែលរងផលប៉ះពាល់ពីការឈ្លានពានតាមព្រំដែនកម្ពុជា-ថៃ។

កិច្ចប្រជុំនេះ ត្រូវបានដឹកនាំដោយ ឯកឧត្តម សាយ សំអាល់ ឧបនាយករដ្ឋមន្រ្តី និង រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ជាមួយ ឯកឧត្តមកិត្តិសង្គហបណ្ឌិត គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ។ គោលបំណងនៃកិច្ចប្រជុំគឺកំណត់ទីតាំងសម្រាប់រៀបចំលំនៅដ្ឋានបណ្តោះអាសន្នសម្រាប់ប្រជាជនដែលរងគ្រោះ និងបំពេញតម្រូវការសុវត្ថិភាពនៅតាមព្រំដែន។

កិច្ចប្រជុំនេះមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ប្រតិបត្តិការរដ្ឋបាលខេត្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដីពីខេត្តបាត់ដំបង បន្ទាយមានជ័យ ពោធិ៍សាត់ ឧត្តរមានជ័យ និងព្រះវិហារ តាមប្រព័ន្ធអនឡាញផងដែរ។

យោងតាមរបាយការណ៍ក្រសួងមហាផ្ទៃ ចាប់តាំងពីថ្ងៃទី ៧ ខែធ្នូ ឆ្នាំ២០២៥ រហូតដល់ព្រឹកថ្ងៃទី ៩ ខែមករា ឆ្នាំ២០២៦ កម្ពុជាបានរងការខូចខាតផ្ទះសម្បែងចំនួន ៣៣៦ ខ្នង និងទ្រព្យសម្បត្តិសាធារណៈដូចជា សាលារៀន មន្ទីរពេទ្យ វត្តអារាម និងហេដ្ឋារចនាសម្ព័ន្ធផ្សេងៗ។

ការរៀបចំលំនៅដ្ឋានបណ្តោះអាសន្ននេះ ស្ថិតក្រោមគោលនយោបាយជាតិគាំពារសង្គមឆ្នាំ ២០២៤–២០៣៥ ដែលផ្តោតលើការគាំទ្រជនងាយរងគ្រោះ និងអ្នកគ្មានទីជម្រក។ គោលនយោបាយនេះផ្ដល់ការគាំទ្រដល់កម្មវិធីសាច់ប្រាក់ឧបត្ថម្ភសម្រាប់សិស្ស និងនិស្សិតពីគ្រួសារក្រីក្រ និងងាយរងគ្រោះ ការរៀបចំលំនៅឋានតម្លៃសមរម្យសម្រាប់ប្រជាជនមានចំណូលទាប និងជនរងគ្រោះ និងការគាំទ្រក្រុមជនងាយរងគ្រោះសម្រាប់ស្នាក់នៅបណ្តោះអាសន្ននៅតាមវត្តអារាម និងទីកន្លែងសាសនាផ្សេងៗ។

គួររំលឹកថា ប្រជាពលរដ្ឋនៅខេត្តទាំង៥នេះ នៅតែបន្តភៀសសឹក និងស្នាក់នៅជំរុំភៀសសឹក ដោយសារតែកងទ័ពថៃបានបើការវាយប្រហារឈ្លានពានមកលើកម្ពុជាតាមបណ្ដោយខ្សែរបន្ទាត់ព្រំដែនកម្ពុជា-ថៃ៕

រូបភាព៖ ក្រសួងរៀបចំដែនដី