ភ្នំពេញ – នាយប់ថ្ងៃទី១០ ខែមករា ឆ្នាំ២០២៦ សម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងសារពិសេសមួយជូនដល់ជនរួមជាតិ ដោយសម្តែងនូវការយល់ចិត្តយ៉ាងជ្រាលជ្រៅចំពោះទុក្ខលំបាករបស់ប្រជាពលរដ្ឋ និងបានគូសបញ្ជាក់យ៉ាងច្បាស់ពីជំហររបស់រាជរដ្ឋាភិបាល ក្នុងការដោះស្រាយបញ្ហាជម្លោះព្រំដែនកម្ពុជា–ថៃ ដោយប្រកាន់យក មធ្យោបាយការទូត និងច្បាប់អន្តរជាតិជាគោល។

ក្នុងសារពិសេសនេះ សម្តេចធិបតី បានមានប្រសាសន៍ថា រាជរដ្ឋាភិបាលយល់ដឹងយ៉ាងច្បាស់អំពីផលវិបាក និងទុក្ខលំបាកនានា ដែលបងប្អូនជនរួមជាតិកំពុងប្រឈម ជាពិសេសប្រជាពលរដ្ឋដែលទទួលរងផលប៉ះពាល់ដោយផ្ទាល់ពីស្ថានភាពតានតឹងនៅតាមបណ្តោយព្រំដែនកម្ពុជា–ថៃ។

សម្តេចនាយករដ្ឋមន្ត្រី បានសង្កត់ធ្ងន់ថា រាជរដ្ឋាភិបាលនឹងបន្តអនុវត្តគ្រប់មធ្យោបាយដែលអាចធ្វើទៅបាន ដោយផ្តោតជាចម្បងលើ មធ្យោបាយការទូត និងច្បាប់អន្តរជាតិ ដើម្បីការពារ អធិបតេយ្យភាព និងបូរណភាពទឹកដីកម្ពុជា និងដោះស្រាយជម្លោះព្រំដែនកម្ពុជា–ថៃ ស្របតាមស្មារតីនៃ សេចក្តីថ្លែងការរួមទីក្រុងគូឡាឡាំពួរ ថ្ងៃទី២៦ ខែតុលា ឆ្នាំ២០២៥ និង សេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥។

ទន្ទឹមនឹងការខិតខំប្រឹងប្រែងដោះស្រាយបញ្ហាជម្លោះព្រំដែន សម្តេចធិបតី ក៏បានអះអាងពីការយកចិត្តទុកដាក់ខ្ពស់ចំពោះ ជីវភាព និងសុវត្ថិភាពរបស់ប្រជាពលរដ្ឋ ផងដែរ។ សម្តេចបានបញ្ជាក់ថា រាជរដ្ឋាភិបាលបាន និងកំពុងប្រើប្រាស់គ្រប់កម្លាំង និងធនធានសរុប ដោយមានការចូលរួមសហការពីគ្រប់ភាគីពាក់ព័ន្ធ រួមមាន បណ្តាប្រទេសជាមិត្ត អង្គការជាតិ និងអន្តរជាតិ ព្រមទាំងវិស័យឯកជន។

បេសកកម្មនៃការកៀរគរធនធានទាំងនេះ គឺមានគោលបំណងដើម្បី ចុះជួយសម្រាលទុក្ខលំបាក និងដោះស្រាយបញ្ហាប្រឈមរបស់ប្រជាពលរដ្ឋឱ្យបានទាន់ពេលវេលា ទាំងសម្រាប់ដំណោះស្រាយបន្ទាន់ក្នុងរយៈពេលខ្លី ក៏ដូចជាការរៀបចំផែនការសម្រាប់រយៈពេលមធ្យម និងវែងផងដែរ។

សារពិសេសនាយប់នេះ ត្រូវបានចាត់ទុកថា ជាសារដ៏មានន័យក្នុងការផ្តល់ ភាពកក់ក្តៅ និងទំនុកចិត្ត ដល់ប្រជាពលរដ្ឋខ្មែរទូទាំងប្រទេស ជាពិសេសប្រជាពលរដ្ឋនៅតំបន់ព្រំដែន ថាប្រមុខរាជរដ្ឋាភិបាលកំពុងតាមដានស្ថានការណ៍យ៉ាងជិតស្និទ្ធ និងចាត់វិធានការយ៉ាងម៉ឺងម៉ាត់បំផុត ដើម្បីការពារជាតិ និងថែរក្សាសុខទុក្ខរបស់ប្រជាជន៕