ដោយ៖ សំនៀង

នៅរសៀលថ្ងៃទី១៩ ខែមករា ឆ្នាំ២០២៦ ថ្នាក់ដឹកនាំ បុគ្គលិក និងសហការរីគ្រប់ផ្នែកទាំងអស់របស់សមាគមសម្ព័ន្ធ​​សហគមន៍​កសិករកម្ពុជា ហៅកាត់ថា CCFC រួមជាមួយតំណាងសហគមន៍មកពីខេត្តកំពង់ស្ពឺ ស្វាយរៀង និងខេត្តកោះកុង សរុប២១នាក់ បានចូលរួមវគ្គបណ្ដុះបណ្ដាលតម្រង់ទិស ស្ដីពីនីតិវិធី និងយន្តការនៃការ​​ផ្ដល់ដីសម្បទានសង្គមកិច្ច ដែលរៀបចំដោយក្រសួងរៀបចំដែនដី នគរូបនីយកម្ម និងសំណង់ នៅទីស្ដីការក្រសួង។

លោក ហ៊ី ចិន្ដា អគ្គនាយករងនៃអគ្គនាយកដ្ឋានលំនៅដ្ឋាន បានផ្ដល់បទបង្ហាញស្ដីអំពី ទ្រនំសុភមង្គល ភូមិ​ឋានក្សេមក្សាន្ត និងបុរីជនបទ ដោយលោកបានបង្ហាញអំពីផែនការក្នុងការរៀបចំជីវិតរស់នៅក្នុងភូមិឋានដែលមានសុវត្ថិភាព និងការរស់នៅបែបសុខដុមរមនាជាមួយគ្នា ជាមួយនឹងការរស់នៅដោយមានលំនៅឋាន​សមរម្យ មានហេដ្ឋារចនាសម្ព័ន្ធគ្រប់គ្រាន់ មានបរិស្ថាន និងអនាម័យល្អ មានសន្តិសុខ និងសុវត្ថិភាព មានបច្ចេកវិទ្យា និងទូរគមនាគមន៍ប្រើប្រាស់គ្រប់គ្រាន់ ដែលទាំងអស់នេះហើយជាការរស់នៅបែបទ្រនំសុភមង្គល ភូមិឋានក្សេមក្សាន្ត និងបុរីជនបទ ដែលរាជរដ្ឋាភិបាល និងថ្នាក់ដឹកនាំរបស់ក្រសួងកំពុងតែយកចិត្ត​​ទុកដាក់ក្នុងការកែលម្អ។

លោក តូច បូទិត្យា អនុប្រធាននាយកដ្ឋានសម្បទានដីសង្គមកិច្ច បានធ្វើបទបង្ហាញស្តីពី នីតិវិធី និងយន្តការនៃការផ្ដល់ដីសម្បទានសង្គមកិច្ច ដោយលោកបានលើកពី គោលបំណង និងគោលដៅរបស់រាជរដ្ឋាភិបាលដែលបាន និងកំពុងរៀបចំឱ្យមានការផ្ដល់ដីសម្បទានសង្គមកិច្ចជូនដល់ប្រជាពលរដ្ឋក្រីក្រ អតីតកងកម្លាំងប្រដាប់អាវុធ អតីតយុទ្ធជន កងទ័ព និងនគរបាលជាតិតាមបណ្ដោយព្រំដែន។

លោកមានប្រសាសន៍ថា កម្មវិធីសម្បទានដីសង្គមកិច្ចនេះត្រូវបានចែកចេញជាពីរផ្នែក គឺ សម្បទានដីសង្គមកិច្ចថ្នាក់មូលដ្ឋាន និងការផ្ដល់ដីសម្បទានសង្គមកិច្ចថ្នាក់ជាតិ។ ហើយផែនការផ្ដល់ដីសម្បទានសង្គមកិច្ចនេះត្រូវបានបែងចែកជា១០ជំហានសំខាន់ៗរួមមាន៖ ការផ្ដួចផ្ដើម និងពិនិត្យកម្មវិធីសម្បទានដីសង្គមកិច្ច ការរៀបចំផែនការបច្ចេកទេស ការផ្សព្វផ្សាយ ការធ្វើផែនទីដីរដ្ឋ ការធ្វើផែនការបែបចូលរួម ការពិនិត្យមើលរបាយការណ៍ដីសម្បទានសង្គមកិច្ច ការជ្រើសរើសអ្នកទទួលដី ផែនការសម្បទានដីសង្គមកិច្ចពេញលេញ ការរៀបចំទីតាំងដី និងការចូលតាំងទីលំនៅ និងការអភិវឌ្ឍន៍ជនបទ។

គោលបំណងសំខាន់ៗនៃវគ្គបណ្ដុះបណ្ដាលវគ្គតម្រង់ទិសនេះមានចំនួន ៣ គឺ៖១, ពង្រឹងសមត្ថភាព៖ ផ្ដល់ចំណេះដឹងដល់បុគ្គលិក និងថ្នាក់ដឹកនាំសហគមន៍ឱ្យយល់ច្បាស់ពីនីតិវិធីច្បាប់ និងយន្តការបច្ចេកទេសក្នុងការផ្ដល់ដីសម្បទានសង្គមកិច្ច។ ២, ការរៀបចំភូមិឋាន៖ ស្វែងយល់ពីគោលការណ៍រៀបចំ "លំនៅជាទ្រនំសុភមង្គល", "ភូមិឋានក្សេមក្សាន្ត" និង "បុរីជនបទ" ដើម្បីលើកកម្ពស់គុណភាពជីវិត។ ៣, លក្ខខណ្ឌនៃការទទួលបានដី៖ បញ្ជ្រាបការយល់ដឹងអំពីលក្ខណៈវិនិច្ឆ័យផ្សេងៗ ដើម្បីឱ្យប្រជាពលរដ្ឋដែលមានតម្រូវការពិតប្រាកដ អាចទទួលបានដីសម្បទានសង្គមកិច្ចតាមផ្លូវច្បាប់។

យ៉ាងនេះក្តីវគ្ពបណ្ដុះប​ណ្ដាលនេះមិ​នទាន់ត្រូវបានបញ្ចប់នៅឡើយទេ ពោលគឺមានការបង្ហាត់បង្ហាញជាច្រើនទៀតដើម្បីចែកជូនបុគ្គលិក និងថ្នាក់ដឹកនាំសហគមន៍ឱ្យបានយល់ច្បាស់ពីនីតិវិធីច្បាប់ និងយន្តការបច្ចេក​ទេសក្នុងការផ្ដល់ដីសម្បទានសង្គមកិច្ចនេះ៕