អត្ថបទ៖ សំនៀង

ក្នុងសេចក្ដីជូនដំណឹង ស្តីពីវិធានការទប់ស្កាត់-កាត់បន្ថយការបំពុលខ្យល់សាធារណៈ និងវិធានការការពារ-ទប់ស្កាត់​ភ្លើងឆេះព្រៃ ដែលចេញដោយរដ្ឋបាលខេត្តពោធិ៍សាត់ បានឱ្យដឹងថា នៅពេលថ្មីៗនេះ មន្ទីរបរិស្ថានខេត្តបានពិនិត្យឃើញថា ស្ថានភាពគុណភាពខ្យល់មានការធ្លាក់ចុះដោយមូលហេតុការណ៍ដុតសំរាម សំណល់រឹងតាមផ្ទះ ការដុតគល់ជញ្ជ្រាំងស្រូវ ដុតស្មៅ ដុតព្រៃចាប់សត្វ រកឃ្មុំ -ល- ដែលបង្កជាបញ្ហាប៉ះពាល់ដល់គុណភាពខ្យល់ និងប៉ះពាល់ដល់សុខភាពប្រជាពលរដ្ឋ។ ដូច្នេះដើម្បីថែរក្សាគុណភាពបរិស្ថាន និងការពារសុខភាពរបស់​ប្រជាពលរដ្ឋ មន្ទីរបរិស្ថានខេត្តពោធិ៍សាត់ សូមណែនាំដល់ប្រជាពលរដ្ឋទាំងអស់គ្នា សហការបញ្ឈប់ការ​​ដុត​សំរាម សំណល់រឹងតាមគេហដ្ឋាន ឬតាមទីវាលសាធារណៈ និងសូមប្រមូលទុកដាក់សំណល់រឹងក្នុងធុងសំរាម និង​ប្រើប្រាស់សេវាប្រមូលសំរាម ក្នុងមូលដ្ឋានយកទៅកាន់ទីលានទុកដាក់សំរាម ឬកប់ទុកក្នុងរណ្ដៅឱ្យបានត្រឹមត្រូវ។ ជាពិសេសសូមបញ្ឈប់ការឈូសឆាយ កាប់ឆ្ការ ទន្ទ្រាន ដុតព្រៃឈើ ដុតស្ទាក់ចាប់សត្វ ការដុត ជញ្ជ្រាំង​ស្រូវ ចំបើង ដើមអំពៅ ស្មៅ និងសំណល់ឧស្សាហកម្មផ្សេងៗ  សូមប្រជាសហគមន៍ ប្រុងប្រយ័ត្នខ្ពស់ក្នុង​​ការប្រើប្រាស់ភ្លើងជាមធ្យោបាយ ដើម្បីចម្អិន អាហារ យកឃ្មុំ ជក់បារី និងការប្រមូលផល-អនុផលព្រៃ​ឈើ​ជាដើម។ សូមចូលរួមថែរក្សាអនាម័យបរិស្ថាន នៅតាមគហដ្ឋាន តាមដងផ្លូវ និងតាមទីសាធារណៈ។

មន្ទីរបរិស្ថានខេត្តពោធិ៍សាត់សង្ឃឹមថា សាធារណជនទាំងអស់នឹងចូលរួមយ៉ាងសកម្ម ដើម្បីធ្វើឱ្យគុណភាពខ្យល់កាន់តែប្រសើរ សម្រាប់ជាប្រយោជន៍ និងសុខុមាលភាពរបស់ប្រជាជនទាំងអស់គា្ន ចាប់ពីសេចក្តីជូនដំណឹងនេះតទៅ។

យោងតាមសេចក្តីជូនដំណឹងអំពីស្ថានភាពគុណភាពខ្យល់នៅក្នុងព្រះរាជាណាចក្រកម្ពុជា ដែលចេញដោយក្រសួងបរិស្ថានសម្រាប់ថ្ងៃទី៣​ ខែកុម្ភៈ ឆ្នាំ២០២៥ ចាប់ពីម៉ោង ៦ ល្ងាច ដល់ម៉ោង ៦ ព្រឹក ថ្ងៃទី៤ ខែកុម្ភៈ ឆ្នាំ២០២៥​ បានឱ្យដឹងថាកំហាប់ភាគល្អិតនិចលគិតជាមធ្យមស្មើនឹង ៤១.០៧ µg/m3 ធៀបនឹងស្តង់ដា ៥០ µg/m3 ហើយបើគិតជាសន្ទស្សន៍គុណភាពខ្យល់ (Air Quality Index) គឺ “ល្អ”។

ក្រសួងក៏បានកំណត់គុណភាពខ្យល់តាមពណ៌មួយចំនួនផងដែរក្នុងនោះមាន៖ ពណ៌ខៀវ គុណភាពខ្យល់ល្អណាស់ មាននៅខេត្តកំពង់ចាម ខេត្តកំពង់ឆ្នាំង ខេត្តកំពង់ស្ពឺ ខេត្តកំពត ខេត្តក្រចេះ រាជធានីភ្នំពេញ ខេត្ត​មណ្ឌលគីរី ខេត្តរតនគិរី ខេត្តស្ទឹងត្រែង  ខេត្តតាកែវ ខេត្តកែប ខេត្តស្វាយរៀង​ ខេត្តឧត្តរមានជ័យ និងខេត្តត្បូងឃ្មុំ។ ពណ៌បៃតង​ គុណភាពខ្យល់ល្អមានខេត្តកណ្តាល ខេត្តកំពង់ធំ​ ខេត្តព្រៃវែង​ ខេត្តប៉ៃលិន និង​​​​ខេត្តព្រះសីហនុ​​ ។  ពណ៌លឿងគុណភាពខ្យល់មធ្យមមាននៅ​ខេត្តបន្ទាយមានជ័យ ខេត្តព្រះវិហារ ខេត្តបាត់​​ដំបង ខេត្តសៀមរាប និងខេត្តកោះកុង​​ ចំណែកពណ៌ក្រហមគឺគុណភាពខ្យល់មានការបំពុលខ្លះដែលកើត​​មាននៅខេត្តពោធិ៍សាត់៕

 រូបភាព៖ ក្រសួងបរិស្ថាន