អត្ថបទ៖ សហការ

ក្រសួងការងារ និងបណ្ដុះបណ្ដាលវិជ្ជាជីវៈ និងសហជីពធំៗនៅកម្ពុជាដែលមកពីគ្រប់និន្នាការ បានរិះគន់ចំពោះ​ការលើកឡើងរបស់សហជីព និងសង្គមស៊ីវិលខ្លះដែលតែងតែរិះគន់ពីការរឹតត្បិតសិទ្ធិសេរីភាពសហជីព ថាជារឿងបំភ្លៃការពិត និងមិនឆ្លុះបញ្ចាំងពីតថភាពពិតនៅកម្ពុជានោះទេ។

ឯកឧត្តម ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានថ្លែងថា៖«កម្ពុជាមិនមានការ​រឹតត្បិតសិទ្ធិសេរីភាពរបស់សហជីពដូចការលើកឡើងនោះទេ ជាក់ស្ដែងកាលពីថ្ងៃទី ១ឧសភាម្សិលមិញ មានសហជីពមកពីគ្រប់និន្នាការ បានប្រារព្ធទិវាពលកម្មអន្តរជាតិបានសម្ដែងមតិ និងកង្វល់របស់ពួកគាត់នៅតាមទីសាធារណៈ ហើយកង្វល់ទាំងអស់នោះ ត្រូវបានក្រសួងការងារ និងស្ថាប័នពាក់ព័ន្ធទទួលយកមកពិនិត្យផងដែរ»។

ឯកឧត្តមបន្តថា៖«ដូច្នេះការលើកឡើងពីការរឹតត្បិតសេរីភាពសហជីពនោះ គឺជាការបំភ្លៃ និងមិនឆ្លុះបញ្ចាំង​ពី​ការតថភាពពិតក្នុងសង្គមកម្ពុជាដែលរាជរដ្ឋាភិបាលគ្រប់អាណត្តិ ជាពិសេសអាណត្តិទី៧នេះបានថែរក្សា និង​​កសាងលំហរសិទ្ធិសេរីភាពសហជីពស្របតាមច្បាប់កំណត់»។

បន្ថែម​​ពីការលើកឡើងរបស់អ្នកនាំពាក្យក្រសួងការងារ សហជីពនៅកម្ពុជាដែលបានប្រារព្ធទិវាពលកម្មអន្តរជាតិលើកទី ១៣៩កាលពីថ្ងៃម្សិលមិញបានមើលឃើញយ៉ាងដូច្នេះដែរ។

បច្ចុប្បន្ននេះនៅកម្ពុជាមានសហជីព និងអង្គការវិជ្ជាជីវៈសរុបចំនួន ៦ ៦០០អង្គភាពដែលកំពុងដំណើរការការងាររបស់ខ្លួនដោយសេរី គ្មានការរឹតត្បិត ឬគ្មានការបំភិតបំភ័យដូចការលើកឡើងដោយក្រុមសហជីព និងអង្គការសង្គមស៊ីវិលមួយចំនួនដែលតាំងខ្លួនជាអ្នកឯករាជ្យ និងមិនព្រមទទួលស្គាល់វឌ្ឍនភាពពិតនៃសង្គមកម្ពុជាដែលទទួលផលចេញពីម្លប់ដ៏ត្រជាក់នៃសន្តិភាពនោះទេ៕

រូបភាព៖​ក្រសួងការងារ