ដោយ៖ វិចិត្រ

សមត្ថកិច្ចចុះបង្ក្រាបបទល្មើសបង្ខាំងមនុស្សដោយខុសច្បាប់ និងជំរិតទារប្រាក់លើស្ត្រី​ជាជន​ជា​តិវៀតណាមម្នាក់ នៅក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ ដោយ​បាន​ចាប់បានជនសង្ស័យដែលជាជនជាតិវៀតណាមម្នាក់។

នាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិក្រសួងមហាផ្ទៃ នៅថ្ងៃទី​១៣ ខែមករា ឆ្នាំ២០២៦ ក្រោមការដឹកនាំរបស់ លោកឧត្តមសេនីយ៍ឯក ង៉េង ជួ ប្រធាន​នាយ​ក​ដ្ឋាននគរបាលព្រហ្មទណ្ឌ បានដឹកនាំសហការជាមួយអធិការដ្ឋាននគរបាលខណ្ឌបឹងកេងកង និងខណ្ឌមានជ័យ ធ្វើការស្រាវជ្រាវ តាមនីតិវិធី និងជំនាញរហូតកំណត់បានទីតាំង​ជន​ល្មើស​ប្រព្រឹត្ត។ លុះនៅថ្ងៃទី១៤ ខែមករា ឆ្នាំ២០២៦ វេលាម៉ោង១១ និង៥០នាទី កម្លាំងជំនាញបាន ធ្វើការជួយសង្គ្រោះជនរងគ្រោះខាងលើ និងឃាត់ខ្លួនជនសង្ស័យម្នាក់ឈ្មោះ HUA VAN BAO ភេទប្រុស អាយុ៣២ឆ្នាំ ជនជាតិវៀតណាម នៅចំណុចខុនដូ URBAN VILLAGE ស្ថិតក្នុង​សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

បច្ចុប្បន្នជនសង្ស័យ និងជនរងគ្រោះខាងលើ ត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនអធិការដ្ឋាននគរបាលខណ្ឌបឹងកេងកង អនុវត្តនីតិវិធីបន្ត៕