អត្ថបទ៖ សំនៀង

យោងតាមការចុះផ្សាយនៅទំព័រហ្វេសបុកផ្លូវការរបស់ អង្គការសង់ត្រាល់បានឱ្យដឹងថា នៅវេលាម៉ោង ៦ ល្ងាច នៅថ្ងៃពុធ ទី២៥ ខែមិថុនា ឆ្នាំ២០២៥នេះ មានពលករប្រមាណជា១០០នាក់ រួមទាំងក្មេងៗ កុមារតូចៗផង ត្រូវបានប៉ូលីសថៃដឹកមកដល់ព្រំដែន វិលចូលប្រទេសកម្ពុជាវិញ ដល់ច្រកព្រំដែនអន្តរជាតិប៉ោយប៉ែត (ព្រំដែនខ្មែរ-ថៃ) ក្រោយពីពួកគាត់រងចាំតាំងពីម៉ោង៥:០០នាទីព្រឹក នៅស្រុកអារញ្ញ ខេត្តស្រះកែវ និងមានសកម្មភាពរារាំងពលករ ពីសំណាក់ប៉ូលីសថៃ មិនឱ្យពលករខ្មែរវិលចូលមកកម្ពុជាវិញ។

យោងតាមប្រភពព័ត៌មានដដែលបានបន្តថា ពលករខ្លះ ត្រូវបានប៉ូលិសថៃ ទៅចាប់ដល់កន្លែងធ្វើការ និងបញ្ជូនមកខ្មែរយើងវិញ ហើយក៏មានពលករខ្លះទៀត ពួកគាត់បានដើរមកពីកន្លែងធ្វើការមកកាន់ច្រកព្រំដែនផងដែរ ដើម្បីរង់ចាំឱ្យថៃនាំមកខ្មែរវិញ។

សូមបញ្ជាក់ថាហេតុការណ៍នេះបានកើតមានឡើង ក្រោយពីក្រុមទាហានថៃ ប្រកាសបិទច្រកព្រំដែនជាឯកតោភាគីទាំងស្រុង ចាប់តាំងពីថ្ងៃទី ២៣ ខែមិថុនា ឆ្នាំ២០២៥កន្លងមកនេះ។ ហេតុការណ៍នេះ បង្កឱ្យមានការមើលឃើញថា កុមារ និងស្ត្រីមួយចំនួន ជាពលករខ្មែរ រងផលប៉ះពាល់ និងប្រឈមបញ្ហាសុខភាព ព្រមទាំងបំពានសិទ្ធិកុមារ និងសិទ្ធិស្ត្រី។ ពលករខ្មែរដែលបានមកដល់កម្ពុជាប្រមាណម៉ោង៦ល្ងាចម្សិលមិញ ត្រូវបានបន្តសំរាកនៅមណ្ឌលសំចតពលករ ក្រុងប៉ោយប៉ែត ដោយចុះពីឡានប៉ូលីស ដូរមកឡើងឡានក្រុងរដ្ឋ ដែលបានរៀបចំដោយអាជ្ញាធរកម្ពុជា និងក្រសួងការងារ និងបណ្ដុះបណ្ដាលវិជ្ជាជីវៈ និងអ្នកខ្លះរងចាំបន្តដំណើរទៅខេត្តរបស់ខ្លួន តាមរយៈឡានក្រុងរដ្ឋ និងអ្នកខ្លះទៀតមានសាច់ញាតិមកទទួលដល់ច្រកព្រំដែនអន្តរជាតិប៉ោយប៉ែតតែម្ដង៕