អត្ថបទ៖ វិចិត្រ

អាជ្ញាធរកម្ពុជា និងថៃ ដែលប្រចាំការនៅច្រកទ្វារអន្តរជាតិប៉ោយប៉ែត-ក្លងលឹក នៅព្រឹកថ្ងៃទី២៤ ខែមិថុនា ឆ្នាំ២០២៥ បាននិងកំពុងតែមមាញឹកក្នុងការពិភាក្សា ដើម្បីស្វែងរកដំណោះស្រាយ អនុញ្ញាតឱ្យពលរដ្ឋនៃប្រទេសទាំងពីរ អាចត្រឡប់ទៅកាន់ប្រទេសកំណើតរៀងៗខ្លួនវិញ។ នេះបើតាមការចុះផ្សាយរបស់ទីភ្នាក់ងារAKPនៅថ្ងៃទី២៤ មិថុនានេះ។

កិច្ចពិភាក្សានេះធ្វើឡើងបន្ទាប់ពីមានការបិទច្រកទ្វារដោយឯកតោភាគីពីសំណាក់ភាគីថៃ ដែលបណ្ដាលឱ្យពលរដ្ឋជាច្រើន រួមទាំងអាជីវករខ្មែរនៅផ្សាររុងក្លឿ ជួបការលំបាក។

ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ នៅព្រឹកមិញនេះ បានពន្យល់ទៅកាន់ប្រជាពលរដ្ឋដែលឈរចាំនៅច្រកទ្វារអន្តរជាតិប៉ោយប៉ែត អំពីមូលហេតុនៃការបិទច្រកដោយឯកតោភាគីរបស់ថៃ និងបានសន្យាថា អាជ្ញាធរកម្ពុជានឹងបន្តខិតខំប្រឹងប្រែងធ្វើការជាមួយភាគីថៃ ដើម្បីរកដំណោះស្រាយជូនប្រជាពលរដ្ឋឱ្យបានឆាប់រហ័ស។

បើតាមទីភ្នាក់ងារAKP ការពិភាក្សានេះផ្ដោតសំខាន់ទៅលើការអនុញ្ញាតឱ្យពលរដ្ឋថៃ ដែលកំពុងស្នាក់នៅ និងធ្វើការងារក្នុងប្រទេសកម្ពុជា អាចត្រឡប់ទៅប្រទេសថៃវិញបាន ខណៈដែលពលរដ្ឋខ្មែរ ជាពិសេសអាជីវករដែលលក់ដូរនៅផ្សាររុងក្លឿ ក៏អាចដឹកជញ្ជូនទំនិញ និងសម្ភាររបស់ខ្លួនត្រឡប់មកកាន់កម្ពុជាវិញផងដែរ។

ឯកឧត្តម អ៊ុំ រាត្រី បញ្ជាក់ថា ប្រជាពលរដ្ឋដែលបានទៅធ្វើការរកស៊ីនៅតាមព្រំដែនថៃ (ផ្សាររុងក្លឿ) មានចំនួនប្រមាណ ៣៥០០តូប និងប្រជាពលរដ្ឋខ្មែរប្រមាណ ៦០០០នាក់ដែលជាម្ចាស់តូប។

គួរបញ្ជាក់ថា កាលពីថ្ងៃចន្ទ ទី២៣ ខែមិថុនា ឆ្នាំ២០២៥ ថៃបានប្រការបិទព្រំដែនទាំងស្រុងជាឯកតោភាគីជាមួយកម្ពុជា ដោយអនុញ្ញាតឱ្យតែអ្នកជំងឺ និងសិស្ស ឆ្លងកាត់ប៉ុណ្ណោះ៕