ដោយ៖ វិចិត្រ

កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ នៅអំឡុងខែវិច្ឆិកា ឆ្នាំ២០២៦ នារាជធានីភ្នំពេញ។ នេះបើតាមសេចក្តីថ្លែងការណ៍របស់ក្រសួងការបរទេស និងសហប្រតិបត្តិ​ការអន្តរជាតិ ចុះថ្ងៃទី១៨ ខែកុម្ភៈ ម្សិលមិញ។

ក្រសួងការបរទេស និងសហប្រតិបត្តិការអន្តរជាតិ​បានឱ្យដឹងនៅក្នុងសេចក្តីថ្លែងការណ៍របស់​ខ្លួនថា នៅក្នុងកិច្ចប្រជុំកំពូលនេះ នឹងមាន​ការ​ចូលរួមពីសំណាក់ប្រមុខដឹកនាំ និងតំណាងរដ្ឋ​ជា​សមាជិកនៃអង្គការអន្តរជាតិហ្វ្រង់កូហ្វូនី (OIF) ព្រមទាំងស្ថាប័នដៃគូនានាជាច្រើន។

អង្គការអន្តរជាតិហ្វ្រង់កូហ្វូនី (OIF) ត្រូវបានបង្កើតឡើងនៅថ្ងៃទី២០ ខែមីនា ឆ្នាំ១៩៧០ ដោយ​ឥស្សរជនកំពូល៤រូប​គឺព្រះបរមរតនកោដ្ឋ​ និងជាអតីតប្រមុខរដ្ឋកម្ពុជា ព្រះបាទនរោត្តម សីហនុ អតីតប្រធានាធិបតីសេណេហ្កាល់ លោក លេអូប៉ូល សេដា សេងហ័រ (Léopold Sédar Senghor) អតីត​ប្រធានា​ធិបតី​នីហ្សេ លោក ហាម៉ានី ឌីអូរី (Hamani Diori) និងអតីតប្រធានាធិបតីទុយនីស៊ី លោក ហាប៊ីប ប៊ួរហ្គីបា (Habib Bourguiba)។ 

ហ្វ្រង់កូហ្វូ​នី ត្រូវបានបង្កើតឡើង ក្នុងគោលបំណងលើកកម្ពស់ការប្រើប្រាស់ភាសាបារាំង និង​កិច្ច​សហប្រតិបត្តិការលើវិស័យនយោបាយ អប់រំ សេដ្ឋកិច្ច និងវប្បធម៌ ក្នុងចំណោមប្រទេស ជាសមាជិក ទាំង ៩០ នៃអង្គការអន្តរជាតិហ្វ្រង់កូហ្វូនី (OIF)។ អង្គការអន្តរជាតិមួយនេះ មានទីស្នាក់ការកណ្ដាលនៅទីក្រុងប៉ារីស នៃប្រទេសបារាំង។

បើតាមសេចក្តីថ្លែងការណ៍ខាងលើបញ្ជាក់ថា កិច្ចប្រជុំកំពូលនេះ ក្នុងគោលបំណងជំរុញ​កិច្ច​សន្ទនា ផ្លាស់ប្តូរយោបល់ និងរិះរកដំណោះស្រាយ ជាក់ស្តែងលើបញ្ហាប្រឈម​ជាសកល​ពាក់​ព័ន្ធនឹងសន្តិភាព និងការអភិវឌ្ឍប្រកបដោយចីរភាព ដែលជាចំណុចអាទិភាពបំផុត​របស់​សមា​ជិកអង្គការ (OIF)។

តាមផែនការណ៍កិច្ចប្រជុំកំពូលហ្វ្រង់កូហ្វូនីលើកទី២០នេះ គ្រោងនឹងប្រព្រឹត្តទៅនៅខេត្ត សៀម​រាប ប៉ុន្តែត្រូវបានផ្លាស់ប្តូរមករៀបចំនៅរាជធានីភ្នំពេញវិញ ដើម្បីធានាបាននូវលក្ខខណ្ឌ ល្អប្រសើរបំផុតសម្រាប់ការរៀបចំ និងការចូលរួមកិច្ចប្រជុំកំពូល និងព្រឹត្តិការណ៍អមនានា៕