ដោយ៖ កែវ រតនៈ

គម្រោងស្ដីពី  ”ការពង្រឹងការបន្សំារបបធានារ៉ាប់រងសង្គម (SASI) “គឺជាកិច្ចសហការអនុវត្តរវាង ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ និងអង្គការហ្គ្រេត (GRET) ដោយមានការឧបត្ថម្ភគាំទ្រពីទីភ្នាក់ងារបារាំងសម្រាប់អភិវឌ្ឍន៍ (AFD) ចាប់ពីឆ្នាំ២០២៣ មកម្លេះ ដែលមានគោលបំណងរួម គឺដើម្បីសិក្សាសមិទ្ធិលទ្ធភាពសម្រាប់ការអនុវត្តរបបសន្តិសុខសង្គមដែលបន្សាំទៅនឹងកម្លាំងពលកម្មតាមទីជនបទ ឆ្ពោះទៅរកការពង្រីកការគ្របដណ្តប់របបសន្តិសុខសង្គម លើវិស័យកសិកម្មនៅក្នុងការបន្សាំខ្លួនទៅនឹងបម្រែបម្រួលអាកាសធាតុ។

ក្នុងសិក្ខាសាលាបិទបញ្ចប់គម្រោងស្ដីពី  ”ការពង្រឹងការបន្សំារបបធានារ៉ាប់រងសង្គម (SASI) “  ដែលប្រារព្ធធ្វើនៅថ្ងៃទី២៩ ខែ មករា ឆ្នាំ២០២៦នេះ លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាប្រធានគណៈកម្មការសម្របសម្រួលគម្រោងស្ដីពី ការពង្រឹងការបន្សំារបបធានារ៉ាប់រងសង្គម (SASI) បានមានប្រសាសន៍ថា ការអនុវត្តគម្រោង SASI គឺពិតជា បានរួមចំណែកយ៉ាងខ្លាំងក្នុងការសិក្សាស្រាវជ្រាវសមិទ្ធិលទ្ធភាពសម្រាប់ការអនុវត្តរបបសន្តិសុខសង្គមដែលបន្សាំទៅនឹងកម្លាំងពលកម្មតាមទីជនបទ និងការពង្រឹងសមត្ថភាពស្ថាប័ន ប.ស.ស. តាមរយៈកិច្ចប្រជុំ និងទស្សនកិច្ចសិក្សានានា ដើម្បីទទួលបានបទពិសោធន៍ និងចំណេះដឹងបច្ចេកទេសថ្មីៗយកមកអនុវត្តគម្រោងប្រកបដោយប្រសិទ្ធភាព ជាពិសេសសម្រាប់ការពង្រីកការគ្របដណ្តប់របបសន្តិសុខសង្គមសម្រាប់វិស័យកសិកម្មនៅក្នុងការបន្សាំខ្លួនទៅនឹងការប្រែប្រួលអាកាសធាតុ។​ យ៉ាងនេះក្តីលោកបន្តថា​បើទោះជាគម្រោង(SASI) បញ្ចប់ទៅហើយក្តី ប៉ុន្តែមិនមែនមានន័យថា កិច្ចការងារដែលបានធ្វើកន្លងមកត្រូវបញ្ចប់នោះទេ ព្រោះថាក្រុមការងារ បានពិភាក្សាគ្នាយ៉ាងលម្អិត ហើយត្រូវធ្វើឱ្យយ៉ាងណាផលធ្វើឱ្យផលប្រយោជន៍នេះបានទៅដល់ក្រុមគោលដៅ។ ហើយនៅថ្ងៃខាងមុខ លោកជឿជាក់ថា​គម្រោងនេះត្រូវបានលទ្ធផលបន្ទាប់ពីពិភាក្សាជាមួយថ្នាក់ដឹកនាំក្រសួងការងារ និងបណ្ដុះបណ្ដាលវិជ្ជាជីវៈ នឹងមានកិច្ចពិភាក្សាបន្តទៀតថាតើត្រូវធ្វើយ៉ាងម៉េចដើម្បីឈានទៅរកគោលដៅដែលភាគីពាក់ព័ន្ធចង់បាន។

លោក​ THIBAUT Hanquet ប្រធានគ្រប់គ្រងកម្មវិធីកិច្ចគាំពារសង្គមនៃអង្គការហ្រ្គេត មានប្រសាសន៍​ថាគម្រោង(SASI)គឺជាគម្រោងដែលបន្សាំទៅនឹងការកើនឡើងរបស់ប្រជាជនតាមទីជនបទ និងប្រជាជនដែលប្រកបរបរកសិកម្មនៅកម្ពុជា ឆ្ពោះទៅរកការពង្រីកការគ្របដណ្តប់របបសន្តិសុខសង្គមលើវិស័យកសិកម្ម និងសុខភាពប្រជាជនកម្ពុជា។ លោក​បន្តថាការពង្រីកនូវវិសាលភាពនៃការធានារ៉ាប់រងនូវសុខភាពសង្គមទៅកាន់ប្រជាជននៅតាមតំបន់ជនបទនៅតែជាបញ្ហាសំខាន់ដែលត្រូវតែបន្តធ្វើ៕