អត្ថបទ៖ កែវ រតនៈ

យោងតាមសេចក្តីបំភ្លឺព័ត៌មានរបស់អគ្គនាយកដា្ឋនអន្តោប្រវសន៍ ដែលចេញនៅថ្ងៃទី១៨ខែកញ្ញាឆ្នាំ​២០​២៦នេះ បានឱ្យដឹងថា នៅថ្ងៃទី១៧ ខែកញ្ញា ឆ្នាំ២០២៥ មានការផ្សព្វផ្សាយព័ត៌មានតាមបណ្ដាញទំនាក់ទំនង សង្គម ដោយ បានធ្វើការបង្ហោះវីដេអូ និងមានខ្លឹមសារថា " គេបើក ច្រកទ្វារព្រំដែនវិញហើយ តែមេត្តាកុំភ្លេចរើបន្លាលួសផង បើបើកគ្រាន់តែបន្លប់បន្លំឱ្យពលរដ្ឋភ្លេចបន្លាលួស ស៊យហើយកម្ពុជា "។

ពាក់ព័ន្ធនឹងករណីនេះ អគ្គនាយកដ្ឋានអន្តោប្រវសន៍ លើកឡើងថា គណនីហ្វេសប៊ុកឈ្មោះ Heng Heng បាន​យកវីដេអូនៅក្នុងផេក (Page Facebook) ឡៃលី ប៉ោយប៉ែត-Laily Poipet មកបង្ហោះនោះគឺជាវីដេអូ​ចាស់របស់លោក ឡៃ លី ជាអ្នកសារព័ត៌មាន ទូរទស្សន៍ភីអិនអិន (PNN) ធ្វើការផ្សាយផ្ទាល់ (Live) នៅបរិវេណប៉ុស្តិ៍នគរបាលច្រកទ្វារព្រំដែនអន្តរជាតិ ស្ទឹងបត់ កាលពីថ្ងៃទី១១ ខែមិថុនា ឆ្នាំ២០២៥ មកម្ល៉េះ។ ហើយគណនីហ្វេសប៊ុកឈ្មោះ Heng Heng គឺជាគណនីហ្វេសប៊ុកប្រើប្រាស់ផ្ទាល់ខ្លួន មិនមានមូលដ្ឋានច្បាស់លាស់ ត្រឹមត្រូវ ដែលមានចេតនាមិនល្អដោយយកវីដេអូព័ត៌មានចាស់មកបង្ហោះ បំពុលសង្គម ធ្វើឱ្យ​សាធារណ​ជន​មានការភ័ន្តច្រឡំជាព័ត៌មានថ្មី។

អគ្គនាយកដា្ឋនអន្តោប្រវសន៍ បញ្ជាក់ថា គិតត្រឹមថ្ងៃទី១៧ ខែកញ្ញា ឆ្នាំ២០២៥ ច្រក ទ្វារព្រំដែនអន្តរជាតិនា​នា និងច្រកទ្វារតំបន់ទាំងអស់ តាមបណ្ដោយខ្សែបន្ទាត់ព្រំដែន កម្ពុជា-ថៃ នៅមិន ទាន់បើកដំណើរឡើងវិញនោះទេ៕