អត្ថបទ៖ យូ វាសនា

រដ្ឋបាលខេត្តព្រះសីហនុកាលពីពេលថ្មីៗនេះ បានជូនដំណឹងដល់សាធារណៈជនដែលជាអ្នកកាន់កាប់ដីលំនៅដ្ឋាន ឬដីកសិកម្ម ព្រមទាំងគ្រប់មន្ទីរ អង្គភាព គ្រប់ស្ថាប័ន និងភ្នាក់ងារហិរញ្ញវត្ថុ ដែលមានការពាក់ព័ន្ធនឹងក្បាលដីទាំងអស់ ស្ថិតនៅក្នុងតំបន់ធ្វើការវិនិច្ឆ័យ ភូមិចំណោតរាម ភូមិគគីរ និងភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ ឲ្យ បានដឹងថា គណៈកម្មការរដ្ឋបាលនឹងបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យ (ប្លង់សុរិយោដី និងបញ្ជីឈ្មោះម្ចាស់ដី) ដែលក្រុមចុះបញ្ជីដីធ្លី នៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត បានធ្វើការវាស់វែង និងប្រមូលទិន្នន័យក្បាលដីកន្លងមក។

សេចក្ដីជូនដំណឹងបន្តថា ការបិទផ្សាយនេះមានរយៈពេល ១៥ ថ្ងៃ ដោយរាប់បញ្ចូលទាំងថ្ងៃ ឈប់សម្រាក ដើម្បីឱ្យភាគីពាក់ព័ន្ធចូលរួមពិនិត្យមើលទិន្នន័យ បញ្ជាក់ពីភាពត្រឹមត្រូវ ឬ ខុសឆ្គងដែលត្រូវកែតម្រូវ ឬជំទាស់លើទិន្នន័យទាំងនោះ ។

ហើយបើផុតកំណត់ខាងលើគណៈកម្មការរដ្ឋបាលសន្មត់ថា ទិន្នន័យដែលបានបិទផ្សាយជូនពិនិត្យជាសាធារណៈនេះ មាន ភាពត្រឹមត្រូវហើយមិនអាចជំទាស់ ឬតវ៉ានៅពេលក្រោយទៀតបានឡើយ ។ សេចក្តីជូនដំណឹងក៏បានបញ្ជាក់ថា ផុតរយៈពេលកំណត់នៃការបិទផ្សាយជាសាធារណៈនេះ គណៈកម្មការរដ្ឋបាលនឹងបូកសរុប របាយការណ៍បញ្ចប់ការបិទផ្សាយ ហើយលើកសំណើរផ្ដល់សិទ្ធិលើអចលនវត្ថុជូនទៅឯកឧត្តមអភិបាលនៃគណៈអភិបាលខេត្ត ដើម្បីពិនិត្យ-សម្រេច រួចបញ្ជូនឲ្យរដ្ឋបាលសុរិយោដីចេញវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ ជូនអ្នក កាន់កាប់ណាដែលបានបំពេញគ្រប់លក្ខខណ្ឌតាមច្បាប់ ។ 

លោក ស៊ុន សុផាត ជាប្រជាពលរដ្ឋរស់នៅភូមិពូធឿងបានប្រាប់បៃតងប៉ុស្តិ៍ថា លោកមានចិត្តសប្បាយរីករាយដែលបានឃើញសេចក្តីប្រកាសរបស់សាលាខេត្ត ជូនដំណឹងដល់សាធារណៈជនដែលជាអ្នកកាន់កាប់ដីលំនៅដ្ឋាន​ទាំងបីតំបន់ដូចជាភូមិចំណោតរាម ភូមិគគីរ និងភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ​ ។ លោកបន្តទៀតថានៅកន្លែងខ្លះបានវាសវែងហើយ ហើយសេចក្តីប្រកាសនឹងខេត្តទុកពេលឱ្យ១៥ថ្ងៃអ្នកដែលមិនទាន់វាស់និងធ្វើការតវ៉ា៕