អត្ថបទ៖ កែវ រតនៈ

ទំព័រហ្វេសប៊ុកផ្លូវការរបស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា នាថ្ងៃទី២៦ ខែមីនា ឆ្នាំ២០២៥ ឯកឧត្តម ទ្បោ ទិត្យច័ន្ទសុភក្តិ ទីប្រឹក្សាអមក្រុមប្រឹក្សាអភិវឌ្ឍន៍កម្ពុជា និងសហការីបានទទួលជួបពិភាក្សាការងារ​​ជាមួយគណៈប្រតិភូចិនមកពីខេត្តសានស៊ី សាធារណរដ្ឋប្រជាមានិតចិន ដឹកនាំដោយលោក Darren Teng ប្រធានក្រុមប្រឹក្សាភិបាលនៃខេមបូឌា ស៊ីឃ្យូរឹធី។

ក្នុងជំនួបនោះឯកឧត្តម ទ្បោ ទិត្យច័ន្ទសុភក្តិ បានសម្តែងនូវការស្វាគមន៍យ៉ាងកក់ក្តៅជូនចំពោះគណៈ​ប្រតិ​ភូ និងបានជម្រាបជូនគណៈប្រតិភូពីរចនាសម្ព័ន្ធរបស់ក្រុមប្រឹក្សាអភិវឌ្ឍន៍កម្ពុជា ស្ថានភាពវិនិយោគនៅកម្ពុជា ច្បាប់ និងបទប្បញ្ញត្តិពាក់ព័ន្ធនឹងការវិនិយោគដែលបើកចំហ មានតម្លាភាព និងអាចប៉ាន់ប្រមាណទុក​ជាមុនបាន ព្រមទាំងការលើកទឹកចិត្តផ្សេងៗដូចមានចែងក្នុងច្បាប់ស្តីពីវិនិយោគនៃព្រះរាជាណាចក្រកម្ពុជា។ ឯកឧត្តមក៏បានជម្រាបជូនគណៈប្រតិភូពីវិស័យអាទិភាពមួយចំនួនសម្រាប់គណៈប្រតិភូធ្វើការគិតគូរ​ពិចារណាក្នុងការបណ្តាក់ទុនវិនិយោគនៅកម្ពុជាផងដែរ។

ជាការឆ្លើយតប លោក Darren និងគណៈប្រតិភូបានថ្លែងអំណរគុណចំពោះឯកឧត្តមទ្បោ ទិត្យច័ន្ទសុភក្តិ ដែលបានចំណាយពេលដ៏មានតម្លៃក្នុងការទទួលជួបគណ:ប្រតិភូនាពេលនេះ និងបានបង្ហាញពីចំណាប់អារម្មណ៍​ក្នុងការវិនិយោគនៅក្នុងប្រទេសកម្ពុជា ដោយលោកមានបំណងស្វែងយល់បន្ថែមពីគោលនយោបាយ និងការលើកទឹកចិត្តផ្សេងៗរបស់រាជរដ្ឋាភិបាលកម្ពុជា។ លើសពីនេះលោកបានសន្យាថា នឹងព្យាយាមផ្សព្វ​ផ្សាយ​​ព័ត៌មានស្តីពីវិនិយោគ និងកៀរគរវិនិយោគិនចិនមកបណ្តាក់ទុនវិនិយោគនៅកម្ពុជាកាន់តែច្រើនទ្បើងថែមទៀត៕

 រូបភាព៖ CDC