អត្ថបទ៖ កែវ រតនៈ

ក្នុងពិធីបើកសន្និសីទចក្ខុវិស័យប្រទេសកម្ពុជា ឆ្នាំ២០២៥ ស្ដីពី «យុទ្ធសាស្ដ្រកំណើនថ្មីរបស់កម្ពុជា៖ អាទិភាពសម្រាប់ការអភិវឌ្ឍប្រកបដោយគុណភាព និងនិរន្ដរជាតិ» ដែលប្រារព្ធធ្វើឡើងនៅសណ្ឋាគារសុខាភ្នំពេញ នៅព្រឹកថ្ងៃទី៤ ខែមីនា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជាមានប្រសាសន៍ថា​«ក្រោយពីបានយកឈ្នះលើសមរភូមិជំងឺកូវិត-១៩ ដែលកាលនោះកម្ពុជាមិនត្រឹមតែប្រយុទ្ធក្នុងសមរភូមិសុខភាពសាធារណៈប៉ុណ្ណោះទេ ប៉ុន្តែក៏បានប្រយុទ្ធជាមួយសមរភូមិ អប់រំ គាំពារសង្គមក៏ដូចជាសេដ្ឋកិច្ចដែលកម្ពុជាបានប្រទេសឡើងវិញក្នុងឆ្នាំ២០២១ និងបានអនុញ្ញតិឱ្យសកម្មភាពសង្គមសេដ្ឋកិច្ចវិលទៅរកប្រក្រតីឡើងវិញបន្តិចម្ដងៗ។ ជាក់ស្ដែងកំណើនសេដ្ឋកិច្ចបានវិលត្រឡប់ទៅរកគន្លងសក្ដានុពលឡើងវិញសន្សឹមៗក្នុងអត្រា៣,១% ៥,១% ៥%ទៅ៦%នៅក្នុងឆ្នាំ២០២១,២០២២,២០២៣ និង២០២៤។ នៅក្នុងឆ្នាំ២០២៥នេះ សេដ្ឋកិច្ចកម្ពុជារំពឹងថានឹងរក្សាបានចលនការរឹងមាំជាមួយនឹងអត្រាកំណើនក្នុងរង្វង់៦,៣%ដែលបន្តទ្រទ្រង់ដោយវិស័យការនាំចេញតួយ៉ាងដូចជាវិស័យកាត់ដេរ និងកម្មន្តសាល មិនមែនកាត់ដេរ ការបង្កើនឡើងវិញនូវវិស័យទេសចរណ៍ និងសេវាគាំទ្រ គួបផ្សំជាមួយនឹងការបន្តស្ថិរភាពនៃកំណើននៃវិស័យកសិកម្ម»។

ក្នុងពិធីនោះដែរសម្ដេចធិបតី បានថ្លែងថា ក្នុងរយៈពេលខ្លី និងមធ្យមខាងមុខ, រាជរដ្ឋាភិបាលនៅតែមានសុទិដ្ឋិនិយមខ្ពស់ថា កំណើនសេដ្ឋកិច្ចនៅមានលទ្ធភាពបន្តសម្រេចបាន ក្នុងរង្វង់ ៦,៥% មធ្យមប្រចាំឆ្នាំ។ តែកំណើននេះនឹងមិនកើតឡើងដោយឯកឯងនោះទេ គឺទាមទារការខិតខំប្រឹងប្រែងពីភាគីពាក់ព័ន្ធ, មិនត្រឹមតែពីសំណាក់រាជរដ្ឋាភិបាលនោះឡើយ៕