អត្ថបទ៖ វិចិត្រ

តាមការចេញផ្សាយរបស់ក្រសួងរៀបចំដែនដី នគរូបនីយកម្ម និងសំណង់ បានជូនដំណឹងដល់ពលរដ្ឋរស់នៅក្នុងភូមិពោធិ៍តាមុំ ឃុំស្វាយជ្រុំ ស្រុកមេសាង ខេត្តព្រៃវែង ឱ្យដឹងថា​ រដ្ឋបាលខេត្តព្រៃវែង នឹងធ្វើការចែកប័ណ្ណកម្មសិទ្ធិធ្លី ជូនដល់ម្ចាស់កម្មសិទ្ធិចាប់ពីថ្ងៃទី១១ ដល់ថ្ងៃទី១២ ខែមិថុនា ឆ្នាំ២០២៥ ដែលទីតាំងចែកប័ណ្ណស្ថិតក្នុងភូមិពោធិ៍តាមុំ។

តាមរយៈសេចក្តីជូនដំណឹងខាងលើរដ្ឋបាលខេត្តព្រៃវែងបញ្ជាក់ថា ចំពោះប័ណ្ណសម្គាល់សិទ្ធិកាន់កាប់ប្រើប្រាស់ដីធ្លីប្រភេទស្លាបមាន់ (ប័ណ្ណស្លាបមាន់) ឬ ប័ណ្ណសម្គាល់សិទ្ធិកាន់កាប់អចលនវត្ថុ ដែលចេញដោយរដ្ឋបាលសុរិយោដីកន្លងមក ក្នុងតំបន់ខាងលើនឹងត្រូវអស់សុពលភាពតាមផ្លូវច្បាប់ ចាប់ពីថ្ងៃចែកវិញ្ញាបនប័ត្រសម្គាល់ម្ចាស់អចលនវត្ថុខាងលើនេះតទៅ។

ជាមួយគ្នានេះ រដ្ឋបាលខេត្តក៏បានស្នើដល់ម្ចាស់ក្បាលដីស្ថិតនៅទីតាំងខាងលើ ដែលមានប័ណ្ណសម្គាល់សិទ្ធិកាន់កាប់ប្រើប្រាស់ដីធ្លី ឬប័ណ្ណសម្គាល់សិទ្ធិកាន់កាប់អចលនវត្ថុកន្លងមកឱ្យយកប័ណ្ណទាំងនោះមកប្រគល់ដល់មន្ត្រីរដ្ឋបាលសុរិយោដី ដើម្បីទទួលយកវិញ្ញាបនប័ត្រសម្គាល់ម្ចាស់អចលនវត្ថុថ្មីជំនួសវិញ ដែលនឹងប្រគល់ជូនដោយមន្ត្រីរដ្ឋបាលសុរិយោដីនៅភូមិពោធិ៍តាមុំ ចាប់ពីថ្ងៃទី ១១ ដល់ថ្ងៃទី១២ ខែមិថុនា ឆ្នាំ២០២៥ ជាកំហិត។

ចំពោះម្ចាស់បំណុលដែលបានទទួលបញ្ចាំ ឬ ហ៊ីប៉ូតែក ពាក់ព័ន្ធនឹងក្បាលដីក្នុងតំបន់វិនិច្ឆ័យខាងលើ រដ្ឋបាលខេត្តព្រៃវែងស្នើឱ្យយកប័ណ្ណទាំងនោះមកជូនមន្ត្រីសុរិយោដីធ្វើនិយ័តកម្មដើម្បីធានាប្រាក់របស់ពួកគេ៕