ដោយ៖ វិចិត្រ

ក្រសួងបរិស្ថាន បានតម្រូវឱ្យ ក្រុមហ៊ុន RONG CHENG INDUSTRIAL INVESMENT (CAMBODIA) CO., LTD. ស្ថិតនៅតំបន់មេសំ ក្នុងភូមិសាស្រ្តឃុំចុងផ្លាស់ ស្រុកកែវសីមា ខេត្តមណ្ឌលគិរី ធ្វើការគ្រប់គ្រង​សំណល់​រឹង រាវឱ្យបានត្រឹមត្រូវចៀសវាងផលប៉ះពាល់បរិស្ថាន។ ដើម្បីឱ្យស្របនឹងនីតិវិធីច្បាប់ និងបទដ្ឋាន​គតិ​យុត្តធរមានបានត្រឹមត្រូវ ក្រសួងបរិស្ថានបានជំរុញឱ្យក្រុមហ៊ុន ធ្វើការតម្កល់ប្រាក់ធានាហិរញ្ញវត្ថុ សម្រាប់​ការស្ដារបរិស្ថានឡើងវិញ និងរៀចំផែនការស្តារបរិស្ថាន នៅពេលមុនពេលបញ្ចប់អាជីវកម្មឱ្យ​ស្រប​តាម​ការតម្រូវដែលមានចែងក្នុងររបាយការណ៍វាយតម្លៃហេតុប៉ះពាល់បរិស្ថាន។ នេះបើតាមការផ្សព្វ​ផ្សាយ​របស់ក្រសួងបរិស្ថាននៅព្រឹកថ្ងៃព្រហស្បតិ៍នេះ។  

ក្រសួងបានបញ្ជាក់ឱ្យដឹងថា នៅថ្ងៃទី១០ ខែមិថុនា ឆ្នាំ២០២៦ ក្រុមការងារអធិការកិច្ចនៃក្រសួងបរិស្ថាន ដោយមានការចូលរួម​ពីមន្ទីរ​បរិស្ថាន​ខេត្តមណ្ឌលគិរី បានចុះត្រួតពិនិត្យការគ្រប់គ្រងបរិស្ថាន និងត្រួត​ពិនិ​ត្យ​ទីតាំងក្រុមហ៊ុនខាងលើ ដោយបានឃើញថា ក្រុមហ៊ុននេះ ពុំបានដំណើរការអាជីវកម្ម ដោយសារ​អាជ្ញា​បណ្ណ​អាជីវកម្មរុករករ៉ែ របស់ក្រសួងរ៉ែ និងថាមពល ហួសសុពលភាព ចាប់តាំងពីខែមីនា ឆ្នាំ២០២៦​មក​ម៉្លេះ។

បើតាមក្រសួងបរិស្ថាន ក្រុមហ៊ុននេះ ក៏កំពុងស្នើសុំ បន្តសុពលភាពអាជ្ញាបណ្ណឡើងវិញផងដែរ។ ក្នុងនោះ​ក្រុម​ការ​ងារ​​បាន​យក​សំ​ណាកទឹកចំនួន១ សំណាក និងសំណាកដី ចំនួន២សំណាក មកវិភាគនៅ​មន្ទីរ​ពិសោធន៍ ក្រសួងបរិស្ថាន ដើម្បីធ្វើជាមូលដ្ឋាក្នុងការវាយតម្លៃ សម្រាប់ការស្ដារបរិស្ថានឡើងវិញ។

ជាមួយគ្នានេះ ក្រសួងបរិស្ថានបាន និងកំពុង បន្តជំរុញការអនុវត្តច្បាប់យ៉ាងតឹងរ៉ឹង ចំពោះអាជីវកម្ម សិប្ប​កម្ម និងរោងចក្រនានា ដែលមិនគោរពបទដ្ឋានគតិយុត្ត បង្កការបំពុល ឬប៉ះពាល់ដល់ធនធានធម្មជាតិ៕