លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជាបានដឹកនាំសហការី និងតំណាងសហគមន៍ក្នុងស្រុកឱរ៉ាល់ខេត្តកំពង់ស្ពឺ បានជួបជាមួយរដ្ឋបាលខេត្តដែលមានឯកឧត្តម តូច ប៉ូលីវ៉ា អភិបាលរងនៃគណៈអភិបាលខេត្តកំពង់ស្ពឺ តំណាងដ៏ខ្ពង់ខ្ពស់របស់ឯកឧត្តម ជាម ច័ន្ទសោភ័ណ អភិបាលនៃគណៈអភិបាលខេត្ត ដើម្បីសម្តែងការគួរសម និងស្នើសុំកិច្ចសហការជួយដល់កសិករតំបន់ជនបទ។ ជំនួបនេះធ្វើឡើងនៅបរិវេណសាលាខេត្តកំពង់ស្ពឺ នាសៀលថ្ងៃទី១៩ ខែសីហា ឆ្នាំ២០២៥។

នាឱកាសនោះលោក ថេង សាវឿន បានលើកឡើងពីការងារមួយចំនួនរបស់សមាគមដែលបាន និងកំពុងអនុវត្តជម្រាបជូនទៅដល់ឯកឧត្តមអភិបាលរង ឱ្យបានជ្រាប ហើយស្នើសុំកិច្ចសហការ និងជួយអន្តរាគមន៍ដល់ប្រជាពលរដ្ឋដែលកំពុងមានបញ្ហាផ្សេងនៅក្នុងខេត្តកំពង់ស្ពឺជាពិសេសប្រជាពលរដ្ឋនៅក្នុងស្រុកឱរ៉ាល់ ដើម្បីអាចចូលរួមដំណើរអភិវឌ្ឍន៍សហគមន៍កសិករថ្នាក់មូលដ្ឋានប្របកដោយចីរភាព និងបរិយាបន្ន។

បន្ទាប់ពីបានស្តាប់នូវរបាយការណ៍ខាងលើរួចមក ឯកឧត្តម តូច ប៉ូលីវ៉ា បានសម្តែងនូវការស្វាគមន៍ និងទទួលយកនូវសំណុំពរទាំងនោះ។ ក្នុងនោះឯកឧត្តមក៏បានលើកឡើងថា រដ្ឋបាលខេត្តនៅតែប្រកាន់ជំហរដោះស្រាយបញ្ហាជូនប្រជាពលរដ្ឋទាំងអស់នៅក្នុងខេត្ត៕