អត្ថបទ៖ សំនៀង

ការពីរសៀលថ្ងៃទី ២៣ ខែកក្កដា ម្សិលមិញ សមាជិកសហគមន៍ប្រើសក្អក៣រូប បានចូលទៅបំភ្លឺ តាមការកោះហៅរបស់សាលាដំបូងខេត្តព្រះវិហារ ពីបទ“អំពើលួច ច្រូតស្រូវ និងដកដំឡូង” តាមការចោទប្រកាន់ពីក្រុមហ៊ុនចិន ឈ្មោះ ហេង រ៉ូយ។ សមាជិកសហគមន៍ទាំង៣នាក់ដែលរងការចោទប្រកាន់នោះ រួមមាន លោក សឿន ថា លោក ពាន សុផាត និងលោក អៀម អោន រស់នៅភូមិប្រើក្អក ឃុំម្លូព្រៃពីរ ស្រុកឆែប ខេត្តព្រះវិហារ។

លោក សឿន ថា បានបញ្ជាក់ប្រាប់បៃតងប៉ុស្តិ៍នៅថ្ងៃទី២៤ ខែកក្កដា ឆ្នាំ២០២៥នេះថា ក្រោយពីបញ្ចប់ការសាកសួរ និងឆ្លើយបំភ្លឺរួចមក ពួកគាត់ទាំង៣នាក់ ត្រូវបានតុលាការសម្រេចដាក់ឱ្យនៅក្រៅឃុំ និងស្ថិតនៅក្រោមការត្រួតពិនិត្យបន្ត។

ជាមួយគ្នានេះ លោក សឿន ថា ស្នើឱ្យតុលាការទម្លាក់ចោលបទចោទប្រកាន់មកលើរូបលោក និងសមាជិក២រូបផ្សេងទៀត ព្រោះពួកគាត់មិនបានប្រព្រឹត្ត ដូចការចោទប្រកាន់របស់ក្រុមហ៊ុននោះទេ ដោយពួកគាត់បានទៅច្រូតស្រូវ និងដកដំឡូងរបស់ខ្លួនឯង ដែលបានដាំប៉ុណ្ណោះ។

សូមបញ្ជាក់ថា លោក សឿន ថា និងសមាជិកសហគមន៍២រូបផ្សេងទៀត ត្រូវបានចោទប្រកាន់ពីបទ"​អំពើលួច ច្រូតស្រូវ និងដកដំឡូង" នៅចំណុចក្រុមហ៊ុនចិន ហេង រ៉ូយ ជាបុត្រសម្ព័ន្ធ របស់ក្រុមហ៊ុន ហេង ហ្វូ កាលពីថ្ងៃទី ១៣ និង១៤ ខែសីហា ឆ្នាំ២០២៤ ដែលមានទីតាំងស្ថិងនៅក្នុងភូមិប្រើសក្អក ឃុំម្លួរព្រៃពីរ ស្រុកឆែប ខេត្តព្រះវិហារ៕