ដោយ៖ វិចិត្រ

ដំរីអាស៊ី ត្រូវបានចាត់ទុកជាប្រភេទសត្វកំពុងរងគ្រោះថ្នាក់ជិតផុតពូជនៅលើពិភពលោក ដោយមានឈ្មោះក្នុងបញ្ជីក្រហមរបស់អង្គការIUCN។ ទោះបីជាប្រឈមនឹងការបាត់បង់ទីជម្រក និងការគំរាមកំហែងផ្សេងៗក៏ដោយ កម្ពុជានៅតែជាប្រទេសមួយដែលមានវត្តមានដំរីអាស៊ីព្រៃក្នុងចំនួនគួរឱ្យកត់សម្គាល់។

បើតាមទំព័រហ្វេសប៊ុកផ្លូវការរបស់មន្ទីរបរិស្ថានខេត្តពោធិ៍សាត់បានឱ្យដឹងថា បច្ចុប្បន្ន កម្ពុជា ត្រូវបានប៉ាន់ប្រមាណថា មានដំរីអាស៊ីព្រៃចន្លោះពី ៤០០ ទៅ ៦០០ក្បាល ដែលភាគច្រើនរស់នៅក្នុងតំបន់ការពារធម្មជាតិនៃជួរភ្នំក្រវាញ និងតំបន់ខ្ពង់រាបភាគខាងកើត។ តំបន់ទាំងនេះ សម្បូរទៅដោយជីវចម្រុះ ប្រព័ន្ធអេកូឡូស៊ី និងទីជម្រាលធម្មជាតិដែលអំណោយផលសម្រាប់ការរស់នៅរបស់ដំរី និងសត្វព្រៃជាច្រើនប្រភេទ។

ក្រៅពីដំរីព្រៃ កម្ពុជាក៏មានដំរីស្រុកប្រមាណជាង ៧០ក្បាលផងដែរ ដែលបន្តដើរតួនាទីក្នុងសកម្មភាពវប្បធម៌ ទេសចរណ៍ និងការអភិរក្សនៅតាមសហគមន៍មួយចំនួន។ នេះជាការឱ្យដឹងបន្ថែមពីប្រភពដដែលខាងលើ។

ជាពិសេស ការថតបានរូបភាពកូនដំរីតូចៗថ្មីៗនៅក្នុងហ្វូងដំរីព្រៃ បានបង្ហាញពីសញ្ញាវិជ្ជមាន នៃការបន្តពូជ និងការរីកចម្រើនរបស់ប្រភេទសត្វដ៏កម្រមួយនេះ។ ការរកឃើញនេះ ត្រូវបានចាត់ទុកថា ជាក្តីសង្ឃឹមដ៏សំខាន់សម្រាប់ក្រុមអ្នកអភិរក្ស និងអ្នកស្រឡាញ់បរិស្ថាន ក្នុងការពង្រឹងកិច្ចខិតខំប្រឹងប្រែងការពារ និងធានានិរន្តរភាពនៃប្រភេទពូជសត្វដ៏មានសារៈសំខាន់មួយនេះនៅកម្ពុជា សម្រាប់មនុស្សជំនាន់ក្រោយ៕