ក្រសួងបរិស្ថាននឹងធ្វើការចែកកូនឈើដោយឥតគិតថ្លៃក្នុងរយៈពេល៣ថ្ងៃ ពោលគឺនៅថ្ងៃទី​១០ ដល់ថ្ងៃទី១៣ ខែកក្កដា ឆ្នាំ២០២៦។ ការចែកនេះនឹងត្រូវធ្វើឡើងនៅទីតាំងមុខ​ក្រសួ​ង​បរិ​ស្ថាន ស្ថិងក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

តាមរយៈការផ្សព្វផ្សាយរបស់ក្រសួងបរិស្ថាននៅថ្ងៃទី២៣ ខែមិថុនានេះ បានឱ្យដឹងថា សម្រាប់​ឆ្នាំ​២០២៦នេះ ក្រសួងបានត្រៀមកូនឈើចំនួន៥លានដើម សម្រាប់ចែកជូនប្រជាពលរដ្ឋ​ដោយ​ឥតគិតថ្លៃ ដែលក្នុងនោះមានកូនត្នោតចំនួន១,៥លានដើម។ កាលពីឆ្នាំទៅ​ក្រសួង​ក៏បាន​ធ្វើការចែកកូនឈើដោយឥតគិតថ្លៃនេះដូចគ្នា ដោយមានការគាំទ្រយ៉ាងខ្លាំងពីប្រជា​ពល​រដ្ឋ តាមរយៈមកទទួលកូនឈើទៅដាំនៅតាមភូមិដ្ឋានរបស់ខ្លួន។

ក្រសួងបានបញ្ជាក់ថា ការដាំដើមឈើនៅតាមមូលដ្ឋាន ជួយឱ្យមូលដ្ឋានស្អាត មានភពបៃតង ស្រូបយកឧស្ម័នផ្ទះកញ្ចក់ បន្សុទ្ធខ្យល់ រួមចំណែកយ៉ាងសកម្ម ក្នុងការឆ្លើយតបទៅនឹង​ការ​ប្រែប្រួល​អាកាសធាតុសកល និងការការពារជីវចម្រុះសម្រាប់មនុស្សជំនាន់ក្រោយ។ ដើមឈើ ទាំងនេះ នឹងក្លាយជាព្រៃឈើធម្មជាតិ ដែលជួយដល់ការថែររក្សាតុល្យភាពប្រព័ន្ធអេកូឡូស៊ី និងជួយលើកកម្ពស់សេដ្ឋកិច្ចមូលដ្ឋាន តាមរយៈការអភិវឌ្ឍគោលដៅលំហែបៃតង៕