ដោយ៖ វិចិត្រ

ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ក្នុងឆ្នាំ២០២៦ ខាងមុខនេះ កម្ពុជានឹង​សម្រេច​លើកលែងទិដ្ឋាការសម្រាប់ភ្ញៀវទេសចរចិនទាំងអស់ដែលមានបំណងធ្វើដំណើរមកទស្សនានៅកម្ពុជា ប៉ុន្តែមិនបានរាប់បញ្ចូលចំពោះភ្ញៀវទេសចរចិនតៃវ៉ាន់នោះទេ ទោះបីធ្វើដំណើរត្រង់​ចេញពីប្រទេសចិន ឬប្រទេសណាក៏ដោយ។ ការណ៍នេះធ្វើឡើង​ក្នុង​គោលបំណង ដើម្បីទាក់​ទាញកំណើនភ្ញៀវទេសចរ​ចិន​មកកាន់ប្រទេសកម្ពុជា ឱ្យកាន់​តែច្រើនឡើងថែមទៀត​។

តាមរយៈសេចក្តីជូនដំណឹងរបស់ក្រសួងទេសចរណ៍ចុះថ្ងៃទី១៥ ខែមករា ឱ្យដឹងថា រដ្ឋាភិ​បាលបានអនុញ្ញាតដាក់ឱ្យលើកលែងទិដ្ឋាការសម្រាប់ពលរដ្ឋចិនដែលកាន់លិខិត​ឆ្លង​ដែន​នៃ​សាធារណរដ្ឋប្រជាមានិតចិន (PRC) ទាំងអស់ រួមទាំងចិនដីគោក ចិនហុងកុង និងចិនម៉ាកាវ លើកលែងចិនតៃវ៉ាន់ ទោះធ្វើដំណើរត្រង់ចេញពីប្រទេសចិន ឬប្រទេសណាផ្សេងក៏ដោយឱ្យ​តែកាន់លិខិតឆ្លងដែន PRC ចូលមកប្រទេសកម្ពុជា នឹងទទួលបានការលើកលែងទិដ្ឋាការ ដោយ​អាចស្នាក់នៅក្នុងប្រទេសកម្ពុជាបាន ចំនួន១៤ថ្ងៃ ក្នុងអំឡុងពេល៤ខែ ដោយគិត​ចាប់​ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ ដោយពុំ តម្រូវឱ្យមានពាក្យស្នើសុំ និង​ពុំ​មានបង់កម្រៃដោយគ្រាន់តែបំពេញ E-arrival card។

ក្នុងសេចក្តីជូនដំណឹងខាងលើនេះ ក្រសួងបញ្ជាក់ថា ក្នុងកំឡុងពេលសុពលភាព នៃការអនុវត្ត​នេះ ភ្ញៀវទេសចរចិនអាចធ្វើដំណើរមកកម្ពុជាប៉ុន្មានលើកក៏បាន ដោយមិនកំណត់ចំនួនដង។

ជាមួយគ្នានេះក្រសួងទេសចរណ៍បានអំពាវនាវដល់សាធារណជន សមាគម ឧស្សាហកម្ម​ទេ​ស​ចរណ៍ ប្រតិបត្តិករទេសចរណ៍ ផ្នែកឯកជន អ្នកសារព័ត៌មាន ភ្ញៀវទេសចរជាតិ-អន្តរជាតិ និង​ភាគីពាក់ព័ន្ធទាំងអស់ ជ្រាប និងចូលរួមអនុវត្តប្រកបដោយស្មារតីទទួលខុសត្រូវខ្ពស់ ព្រម​ទាំង​ចូលរួមផ្សព្វផ្សាយឱ្យបាន ទូលំទូលាយតាមគ្រប់មធ្យោបាយ និងគ្រប់រូបភាពសំ​ដៅ​ជំរុញ​កំ​ណើនភ្ញៀវទេសចរចិនមកកាន់ព្រះរាជាណាចក្រកម្ពុជា ឱ្យកាន់តែច្រើន​ឡើង​ថែម​ទៀ​ត៕