អត្ថបទ៖ កែវ រតនៈ

លោក ម៉េត មាសភក្តី អ្នកនាំពាក្យរដ្ឋបាលខេត្តឧត្តរមានជ័យមុនបានប្រាប់បៃតងប៉ុស្តិ៍ថា ព្រឹត្តការណ៍ផ្ទុះអាវុធនៅប្រាសាទតាមាន់កាលពីថ្ងៃទី២៤ ខែកក្កដា ឆ្នាំ២០២៥  ភ្ញៀវទេសចរមានការកើនឡើងគួរឱ្យកត់សំគាល់ ជាក់ស្តែងក្នុងឆមាសទី១ ខេត្តឧត្តរមានជ័យទទួលបានភ្ញៀវជាតិ៤៦៥ ,៩៩២នាក់ កើន២៤២ % និងភ្ញៀវបរទេស១៥,៧៤២នាក់ កើន១៥២ %។ការកើនឡើងនេះដោយសារ រដ្ឋបាលខេត្ត រៀបចំបង្កើតព្រឹត្តការណ៍​ទាក់ទាញ ក្នុងអំឡុងពេលបុណ្យជាតិ និងការផ្សព្វផ្សាយពីគោលដៅទេសចរណ៍សំខាន់ៗមួយចំនួនកាន់តែទូលំទូលាយ។

លោកបន្តថា ភ្ញៀវទេសចរជាតិ និងបរទេស ចាប់អារម្មណ៍ប្រាសាទតាមាន់ និងតាក្របីជាយូរមកហើយ តែថ្មីៗនេះដោយ​សាររឹតតែមានការឈ្លានពានពីកងទ័ពថៃធ្វើឱ្យប្រាសាទនេះ រឹតតែមានការយកចិត្តទុកដាក់ និងជាគោលដៅសំខាន់ដែលភ្ញៀវចាប់អារម្មណ៍ចង់មកទស្សនាបន្ថែមទៀត នៅពេលប្រទេសវិលទៅមានស្ថាន​ភាពដូចដើមមុនការផ្ទុះអាវុធវិញផងដែរ។

លោក ម៉េត មាសភក្តី ឱ្យដឹងទៀតថា អំឡុងពេលផ្ទុះអាវុធ មានសប្បុរសជនបានយកអំណោយទៅចែកជូនដល់វរៈកងទ័ពក៏ដូចជាជនភៀសសឹក ក្នុងខេត្តឧត្តរមានជ័យ ហើយបន្ទាប់ពីចែកអំណោយ នៅពេលដែលគាត់សល់ពេលគឺគាត់ឆ្លៀតទៅកម្សាន្តតាមគោលដៅទេសចរណ៍ធម្មជាតិ និងតំបន់ប្រវត្តិសាស្ត្រមួយចំនួន និងភ្ញៀវខ្លះ គាត់បានស្នាក់នៅតាមបណ្តាសណ្ឋាគារ និងផ្ទះសំណាក់ផងដែរ។

ករណីនេះ លោក ម៉េត មាសភក្ដី អះអាងថាអាចថាជាឱកាសក៏ថាបាន អំឡុងពេលនេះ មិនថាតែប្រជាពលរដ្ឋ ឬភ្ញៀវទេសចរកាន់តែស្គាល់ខេត្តឧត្តរមានជ័យ កាន់តែច្បាស់ជាងមុន ហើយក៏ស្គាល់នូវគោលដៅទេសចរណ៍​មួយចំនួន ក៏មិនចាញ់ខេត្តធំៗផងដែរ។

ខេត្តឧត្តរមានជ័យ មានតំបន់ទេសចរណ៍ទាក់ទាញជាច្រើនកន្លែងដូចជា តំបន់ធម្មជាតិថ្មដាអូរទឹកខៀវ ប្រាសាទ​តាក្របី ប្រាសាទតាមាន់ បឹងស្នោ តំបន់ប្រវត្តិសាស្ត្រ ផ្ទះតាម៉ុកសារមន្ទីរតាម៉ុក តំបន់ប្រវត្តិសាស្ត្រ ដុតសព ប៉ុល ពត ស្ពានទ័ព តំបន់ធម្មជាតិរលុះធំ  ប្រាសាទខ្នាជាដើម៕

 រូបភាព៖ ហ្វេសប៊ុកលោក ម៉េត មាសភក្ដី