ដោយ៖ វិចិត្រ

កម្ពុជាតាមរយៈក្រសួងការបរទេស និងសហប្រតិបត្តិការអន្តរជាតិ បានធ្វើការតវ៉ាជា​ផ្លូវការ​ប្រ​ឆាំង​នឹងសកម្មភាពរបស់កងកម្លាំងប្រដាប់អាវុធថៃដែលបានពង្រឹងការកាន់កាប់ដោយខុស​ច្បា​ប់​​មកលើអធិបតេយ្យរបស់កម្ពុជា នៅថ្ងៃទី១៨ ខែ​មេសា ឆ្នាំ២០២៦។

នៅក្នុងសេចក្តីប្រកាសព័ត៌មាន ចុះថ្ងៃទី១៩ ខែមេសា ឆ្នាំ២០២៦ របស់ក្រសួងការបរទេស និងសហប្រតិបត្តិការអន្តរជាតិកម្ពុជាបានឱ្យដឹងថា កងកម្លាំងប្រដាប់អាវុធថៃ បាន​រំ​លោភ​លើ​អធិបតេយ្យ និងបូរណភាពទឹកដីរបស់កម្ពុជា។

ក្នុងនោះ នៅឃុំស្រអែម ស្រុកជាំក្សាន្ត ខេត្តព្រះវិហារ កងកម្លាំងប្រដាប់អាវុធថៃបានសាងសង់ ប៉ុស្តិ៍យាម​សង្កេតការណ៍ នៅក្នុងតំបន់ប្រាសាទព្រះវិហារ។

ចំពោះនៅខេត្តឧត្តរមានជ័យ នៅស្រុកអន្លង់វែង កងកម្លាំងប្រដាប់អា វុធថៃបានបន្តសាងសង់ ផ្លូវ នៅជិតបង្គោលព្រំដែនលេខ២ បច្ចុប្បន្ន និងនៅតំបន់ដើមតាត្រាវ ស្រុកត្រពាំងប្រាសាទ។ នៅស្រុកបន្ទាយអំពិល កងកម្លាំងប្រដាប់អាវុធថៃបានផីក​លេណដ្ឋាន​នៅ​តំបន់ច្រកទ្វារអន្តរ ជាតិ ជប់គគីរ។ នៅសង្កាត់កូនក្រៀល ក្រុងសំរោង កងកម្លាំងប្រដាប់​អា​វុ​​ធថៃបានសាងសង់ ប៉ុស្តិ៍យាមសង្កេតការណ៍ នៅភាគខាងកើតនៃតំបន់ជប់ដើមខ្នុរ និងបាន​បន្ត​សកម្មភាពឈូស ឆាយដី នៅភាគខាងជើង នៃតំបន់នេះ។ នៅតំបន់ថ្មដូន កងកម្លាំងប្រដាប់​អា​វុធ​ថៃបានបន្ត សាងសង់ផ្លូវថ្មើរជើង ព្រមទាំងសាងសង់លេណដ្ឋាន និងផ្លូវ នៅភាគខាងកើត​ច្រក​ទ្វារថ្មដូន។

ចំណែកឯក្នុងខេត្តពោធិ៍សាត់ នៅឃុំថ្មដា ស្រុកវាលវែង កងកម្លាំងប្រដាប់អាវុធថៃបានប្រើ ប្រាស់​​គ្រឿងចក្រធុនធ្ងន់ ដើម្បីធ្វើសកម្មភាពឈូសឆាយដីបន្ថែមទៀត នៅតំបន់អូរភ្លុកដំរី។

កម្ពុជាបានចាត់ទុកសកម្មភាពទាំងនេះគថាជាការរំលោភលើការប្តេជ្ញាចិត្តរបស់ប្រទេសថៃផ្ទាល់ ក្រោមធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងសន្ធិសញ្ញាមិត្តភាព និងសហ​ប្រ​តិ​បត្តិការនៅអាស៊ីអាគ្នេយ៍(TAC) ជាពិសេសគោលការណ៍នៃការដោះស្រាយវិវាទដោយ​សន្តិ​វិធី ការគោរពអធិបតេយ្យភាពទឹកដី និងការមិនប្រើប្រាស់កម្លាំងប្រឆាំងនឹងរដ្ឋមួយផ្សេង​ទៀត​។

ជាមួយគ្នានេះ កម្ពុជា បានអំពាវនាវឱ្យប្រទេសថៃបញ្ឈប់រាល់សកម្មភាពឯកតោភាគីបន្តទៀត នៅក្នុងតំបន់ដែលបានរៀបរាប់ខាងលើ ឬ តំបន់ផ្សេងទៀត ដែលស្ថិតក្នុងកាលៈទេសៈស្រ​ដៀង​​គ្នានេះ សំដៅកាត់បន្ថយភាពតានតឹង ពង្រឹងជំនឿជាក់និងទំនុកចិត្តគ្នាទៅវិញទៅមក ព្រមទាំងរក្សាសន្តិភាព ស្ថិរភាព និងភាពជាអ្នកជិតខាងល្អតាមបណ្តោយព្រំដែនកម្ពុជា-ថៃ។

នៅក្នុងលិខិតដដែលខាងលើរដ្ឋាភិបាលកម្ពុជា បានបញ្ជាក់ជាថ្មីនូវការប្តេជ្ញាចិត្តយ៉ាងខ្ជាប់ខ្ជួន និងឥតងាករេរបស់ខ្លួនក្នុង ការស្វែងរកដំណោះស្រាយជម្លោះព្រំដែនទាំងអស់ជាមួយ​ប្រទេស​ថៃ ក៏ដូចជាជាមួយប្រទេស ជិតខាងទាំង អស់របស់ខ្លួន ដោយសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគី ព្រមទាំងរក្សាយ៉ាងខ្ជាប់ខ្ជួន នូវជំហរជាគោលការណ៍របស់ខ្លួនថា ខ្សែព្រំដែនមិនត្រូវបានផ្លាស់ប្តូរដោយការប្រើកម្លាំងឡើយ៕