អត្ថបទ៖ សំនៀង

ដើម្បីទប់ស្កាត់បញ្ហាបំពុលបរិស្ថានជាបន្តទៀត ក្រុមការងារក្រសួងបរិស្ថានបានចាត់វិធានការច្បាប់ ដោយ​តម្រូវឱ្យទីតាំងអាជីវកម្មចំនួន៥ ផ្អាកសកម្មភាពអាជីវកម្មជាបណ្តោះអាសន្ន រហូតដល់មានការ​សម្រេច​ជា​ថ្មី​ពីក្រសួងបរិស្ថាន។ នេះបើតាមការចុះផ្សាយរបស់ក្រសួងបរិស្ថាន នៅថ្ងៃទី១០ ខែកុម្ភៈ ឆ្នាំ២០២៦នេះ។

ក្នុងនោះក្រសួងបានបញ្ជាក់ឱ្យដឹងថា កិច្ចអន្តរាគមន៍នេះធ្វើឡើង បន្ទាប់ពីមានសេចក្តីរាយការណ៍ពីប្រជា​ពលរដ្ឋ ក្រុមការងារអធិការកិច្ច នៃអគ្គនាយកដ្ឋានគាំពារបរិស្ថាន ដឹកនាំដោយលោក ចាប យុធី អនុ​ប្រធាន នាយកដ្ឋាន ដោយមានការចូលរួមពីមន្ទីរបរិស្ថានខេត្តត្បូងឃ្មុំ រដ្ឋបាលស្រុកមេមត់ និងអាជ្ញាធរឃុំមេមត់ នៅថ្ងៃទី៦-៧ ខែកុម្ភៈ ឆ្នាំ២០២៦ បានចុះត្រួតពិនិត្យ និងបានរកឃើញបញ្ហាបំពុលបរិស្ថាន និងចំណុច ខ្វះខាតរបស់ទីតាំងអាជីវកម្មក្រុមហ៊ុនប្រមូលទិញជ័រកៅស៊ូបង្កកទាំង៥ទីតាំង នៅក្នុងស្រុក​មេ​មត់ ខេត្ត ត្បូង​ឃ្មុំ បានបង្កបញ្ហាក្លិនអាក្រក់ ចេញពីកន្លែងជ័រកៅស៊ូបង្កក និងពីរណ្តៅស្តុកសំណល់រាវ ពោលគឺទឹក លាងសម្អាតក្នុងទីតាំងស្តុក។

ក្រសួងបរិស្ថានបានឱ្យដឹងបន្តថាក្រុមការងារបានពិនិត្យឃើញថាក្រុមហ៊ុនទាំងអស់នោះ ពុំបានគ្រប់គ្រង​សំ​ណ​ល់រាវត្រឹមត្រូវតាមលក្ខណៈបច្ចេកទេស និងច្បាប់ ដែលគ្មានមានអាងសម្អាតជ័រ ដោយទីតាំង​នីមួយ​ៗ គ្រាន់តែមានរណ្តៅដីសម្រាប់ស្តុកទឹកសំណល់ប៉ុណ្ណោះ។ លើសពីនេះទីតាំងអាជីវកម្មទាំងនោះបានដំ​ណើរ​ការដោយកគ្មានកិច្ចសន្យាការពារបរិស្ថានផងដែរ។

ជាមួយគ្នានេះ ក្រសួងបរិស្ថាន បានតម្រូវឱ្យម្ចាស់ទីតាំងនីមួយៗ អនុវត្តវិធានការកែប្រែ ដោយតម្រូវឱ្យរៀ​ចំ​អាង​ប្រព្រឹត្តិកម្មសំណល់រាវ ដោយត្រូវអនុលោមតាមគោលការណ៍បច្ចេកទេស និងមាត្រា២៨៧ នៃក្រម​បរិ​ស្ថាន​ និងធនធានធម្មជាតិ ដើម្បីកាត់បន្ថយបញ្ហាក្លិនស្អុយ និងទប់ស្កាត់ការបំពុលទឹកសាធារណៈ ឱ្យបាន រួចរាល់ ក្នុងរយៈពេល៣ខែ។ លើសពីនេះ ម្ចាស់ទីតាំងនីមួយៗ ត្រូវរៀបចំកិច្ចសន្យាការពារបរិស្ថាន រួចត្រូវ ដាក់ជូនក្រសួងបរិស្ថាន ដើម្បីធ្វើការពិនិត្យ និងអនុម័ត ដោយអនុលោមតាមលិខិតបទដ្ឋានពាក់ព័ន្ធ ឱ្យ បានរួចរាល់ក្នុងរយៈពេល៣ខែ។

សូមបញ្ជាក់ថា ទីតាំងអាជីវកម្មប្រមូលទិញជ័រកៅស៊ូបង្កកទាំង៥រួមមាន ទីតាំងទី១ ស្ថិតនៅភូមិសង្គម​មាន​ជ័យ ឃុំមេមត់ ស្រុកមេមត់ ទីតាំងទី២ ស្ថិតនៅភូមិជាំម្អោរ ឃុំមេមត់ ស្រុកមេមត់ ទីតាំងទី​៣​​ ស្ថិតនៅ​ភូមិជាំម្អោរ ឃុំមេមត់ ស្រុកមេមត់ ទីតាំងទី៤ ស្ថិតនៅភូមិសង្គមមានជ័យ ឃុំមេមត់ ស្រុកមេមត់ ទីតាំងទី៥ ស្ថិតភូមិដក់ព័រ ឃុំទ្រៀក ស្រុកមេមត់ នៃខេត្តត្បូងឃ្មុំ៕