ដោយ៖ វិចិត្រ

ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថាន បានលើកឡើងថា ក្នុងនាមជាអភិបាល មើល​ថែ​រក្សាការពារបរិស្ថាន និង​តុល្យភាពនៃទ្រព្យសម្បត្តិធម្មជាតិ រួមទាំង ខ្យល់ ទឹក និងដី។ ក្រសួងបរិស្ថានមាន​ភារ​កិច្ច​ចម្បង​ គឺ ការពារ និងទប់ស្កាត់ប្រភពបំពុលផ្សេងៗ ដើម្បី​រក្សា​បាន​នូវតុល្យភាពបរិស្ថានល្អ និង​ការពារសុខភាពប្រជាពលរដ្ឋពីជំងឺដង្កាត់ ឬ ជំងឺឆ្លងនានា។ ការ​លើកឡើងរបស់រដ្ឋមន្រ្តីក្រសួងបរិស្ថានបែបនេះ នៅក្នុងកិច្ចប្រជុំប្រចាំខែ​របស់អគ្គ​នាយកដ្ឋាន​គាំពារបរិស្ថាន នាថ្ងៃទី៩ ខែកុម្ភៈ ឆ្នាំ២០២៦ នៅទីស្តីការក្រសួងបរិស្ថាន។

រដ្ឋមន្ត្រីក្រសួងបរិស្ថានរូបនេះបានដាក់ចេញនូវវិធានការបន្ទាន់ចំនួន៤ចំណុច ដើម្បីការពារ​អា​យុជីវិត និងសុខមាលភាពប្រជាពលរដ្ឋ និងបរិស្ថានរួមមាន ទី១ ត្រូវពិនិត្យមើលលើ​ទិដ្ឋ​ភាព​ច្បាប់ បច្ចេកទេសគ្រប់ជ្រុងជ្រោយ និងមានល្បឿនលឿន មុនការសម្រេច ឬអនុញ្ញាតឱ្យ​មាន​ការវិនិយោគណាមួយ និងត្រូវធានាឱ្យបាននូវប្រភពបំពុលនានាទៅដល់មនុស្ស សត្វ និងបរិ​ស្ថា​នជាតិ។ ទី២ ការអនុវត្តនូវសិទ្ធិសម្រេចត្រូវធ្វើឡើងតាមឋានានុក្រម និងគោរពតាមច្បាប់ ដែលមានចែងជាធរមាន ដោយមិនមានការរត់ការ អន្តរាគមន៍ក្រៅផ្លូវច្បាប់ ឬកែសម្រួល​ឱ្យ​ស្របតាមលក្ខខណ្ឌបច្ចេកទេស ដែលផ្ទុយពីច្បាប់បានចែងឡើយ។ ទី៣ ត្រៀមខ្លួនជានិច្ចមុន​ការចូលរួមកិច្ចប្រជុំពិភាក្សា ការផ្តល់យោបល់ និងធាតុចូលត្រូវតែការពារដល់​ផលប្រយោជន៍​ប្រជាពលរដ្ឋ និងបរិស្ថានជាចម្បង រួមទាំងក្រុមហ៊ុនវិនិយោគក្នុង និងក្រៅស្រុក។ ទី៤ រាល់​កិច្ច​ប្រជុំដែលបានចូលរួមចាំបាច់ត្រូវមានកំណត់ហេតុ ឬរបាយការណ៍ផ្លូវការ ទុកជាអំណះ​អំ​ណា​ងក្នុងការផ្តល់យោបល់ ធាតុចូល និងសម្រាប់តាមដាន ត្រួតពិនិត្យការវិវឌ្ឍការងារបន្ត។

ឯកឧត្តមបន្តថា ការអនុវត្តបាននូវវិធានការទាំង៤នេះនឹងជួយគាំទ្រទៅដល់អ្នកវិនិយោគ ដែល​មានភាពស្អាត​ក្នុងវិស័យបរិស្ថាន និងធានាបាននូវការការពារតុល្យភាពបរិស្ថាន ការពារ​ផល​ប្រយោជន៍ជាតិ រួមមានខ្យល់ ទឹក និងដីឱ្យមានភាពស្អាត ដើម្បីកាត់បន្ថយ និងទប់ស្កាត់ការ​បំ​ពុលទៅលើសុខភាពប្រជាពលរដ្ឋ៕