ដោយ៖ វិចិត្រ

នៅក្នុងវេទិកាដែលរៀបចំឡើងនៅថ្ងៃទី១០ ខែធ្នូ ឆ្នាំ២០២៥ នាសណ្ឋាគារសាន់វេ ក្រុមសង្គមស៊ីវិល និងសហជីពបានជម្រុញឱ្យរដ្ឋាភិបាលផ្តល់សច្ចាប័នលើអនុសញ្ញា C-១៩០ ដើម្បីលុបបំបាត់អំពើហិង្សាទាក់ទងនឹងយេនឌ័រ និងការបៀតបៀននៅក្នុងពិភពការងារ។

លោកស្រី ហេង ចិន្តា អគ្គលេខាធិការសហភាពការងារកម្ពុជា-CLC ថ្លែងថា អំពើហិង្សា និងការបៀតបៀននៅក្នុងកន្លែងការងារនៅតែកើតមានជាហូរហែ បើទោះជាមានការផ្សព្វផ្សាយការអប់រំយ៉ាងណាក្តី។ ដោយលោកស្រីបន្តថា វាពិតជាមានសារៈសំខាន់ណាស់ដែលរដ្ឋាភិបាលត្រូវផ្តល់នូវសច្ចាប័នលើអនុសញ្ញាC-១៩០នេះ ព្រោះវាផ្តល់នូវអត្ថប្រយោជន៍ទៅដល់កម្មករកម្មការិនីនៅគ្រប់វិស័យ។

ចំណែកលោក វ៉ន ប្រធានសមាគមប្រជាធិបតេយ្យឯករាជ្យ​នៃសេដ្ឋកិច្ចក្រៅប្រព័ន្ធ (IDEA) ថ្លែងថា អនុសញ្ញាC-១៩០ គឺផ្តល់នូវការការពារ កុំឱ្យមានការរំលោភបំពាននៅក្នុងពិភពការងារទាំងបុរស និងស្ត្រី ពីសំណាក់ថៅកែ។ លោបន្តថា បើរដ្ឋាភិបាលផ្តល់នូវសច្ចាប័នលើអនុសញ្ញានេះ គឺមានន័យថាបានផ្តល់នូវការការពាររួចជាស្រេច មិនឱ្យមានការរំលោភបំពានផ្សេងៗនៅក្នុងវិស័យការងារ។ ជាមួយគ្នានេះ ការបង្កា និងយន្តការដោះនៃការស្រាយក៏ជារឿងសំខាន់ផងដែរ។

សម្រាប់លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ​ ថ្លែងថា បើទោះជានៅកម្ពុជាមានច្បាប់រដ្ឋធម្មនុញ្ញដែលច្បាប់កំពូលរបស់ប្រទេស ព្រមទាំងច្បាប់មួយចំនួនទៀតដូចជា ច្បាប់ស្តីពីការងារ ច្បាប់ស្តីពីសហជីព និងអនុសញ្ញារបស់អង្គកាអន្តរជាតិខាងការងារ ក៏ដោយ ក៏គេសង្កេតឃើញថានៅមានភាពចន្លោះប្រហោង ទើបនាំឱ្យអង្គការILO បានអនុម័តដាក់ឱ្យប្រើអនុសញ្ញាC-១៩០ ដែលអនុសញ្ញានេះមានវិសាលភាពគ្របដណ្តប់ទៅលើកម្មករទាំងអស់គ្រប់វិស័យ​ ក្នុងនោះរាប់បញ្ចូលទាំងមន្ត្រីរាជការផងដែរ។

ក្រុមការងារតស៊ូមតិ របស់ ILO C-190 កំពុងធ្វើការរួមគ្នាជាមួយសហជីព អ្នកដឹកនាំស្ត្រី បណ្តាញ និងអ្នកពាក់ព័ន្ធសំខាន់ៗ ដើម្បីរៀបចំ ដំណើរការយុទ្ធនាការ១៦ថ្ងៃ ដើម្បីដោះស្រាយបញ្ហាសិទ្ធិការងារនៃការទទួលបានប្រាក់ឈ្នួលទាប ការបណ្តេញចេញដោយអយុត្តិធម៌ ការរើសអើង យេនឌ័រយ៉ាងទូលំទូលាយអំពើហិង្សាផ្អែកលើយេនឌ័រ (GBV) និងការបៀតបៀននៅកន្លែងធ្វើការ៕