អត្ថបទ៖ យូ វាសនា

ដើម្បីរំលឹកដល់ព្រឹត្តិការណ៍ជាប្រវត្តិសាស្ត្រ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ក៏បានចូលរួមរត់អបអរសាទរផងដែរ។

ព្រឹត្តិការណ៍នេះបាននាំអ្នកចូលរួមទាំងអស់ រត់ឆ្លងកាត់ឧបសគ្គដ៏សប្បាយរីករាយ និងពោពេញដោយការផ្សងព្រេង ឆ្ពោះទៅកាន់សំណង់ស្ថាបត្យកម្មដ៏អស្ចារ្យ និងជារមណីយដ្ឋានប្រវត្តិសាស្ត្រដ៏ល្បីល្បាញ គឺប្រាសាទព្រះវិហារ ដែលកំពុងឈរបង្ហាញខ្លួនយ៉ាងសង្ហានៅលើកំពូលភ្នំដងរ៉ែក។

ថ្ងៃទី៧ ខែកក្កដា ឆ្នាំ២០២៥នេះ គឺជាខួប ១៧ឆ្នាំនៃការចុះបញ្ជីប្រាសាទព្រះវិហារជាសម្បត្តិបេតិកភណ្ឌពិភព​​លោក​​ដោយអង្គការយូណេស្កូ កាលពីថ្ងៃទី៧ ខែកក្កដា ឆ្នាំ២០០៨ ដែលជាព្រឹត្តុការណ៍ដ៏មហោឡារិក និងជាមោទកភាពដ៏ធំធេងបំផុតសម្រាប់ កូនខ្មែរគ្រប់ៗរូបចងចាំមិនអាចបំភ្លេចបាន។

ប្រាសាទព្រះវិហារ មានទីតាំងលាតសន្ធឹងនៅលើខ្ពង់រាបនៃជួរភ្នំដងរែក ដែលមានរយៈកម្ពស់ ៦២៥ម៉ែត្រ ធៀបនឹងកម្ពស់ទឹកសមុទ្រ ស្ថិតក្នុងស្រុកជាំក្សាន្ត ខេត្តព្រះវិហារ ។ ប្រាសាទដ៏ចំណាស់មួយនេះ បានចាប់ផ្តើមកសាងក្នុង រជ្ជកាលព្រះបាទយសោវរ្ម័នទី១ (៨៨៩-៩១០គ.ស) និងបញ្ចប់ក្នុងរជ្ជកាលព្រះបាទសូរ្យវរ្ម័នទី២ (១១១៣-១១៥០គ.ស) ដើម្បីឧទ្ទិសដល់អាទិទេព ព្រះឥសូរក្នុងសាសនាហិណ្ឌូក្នុងទម្រង់ជាទេពភ្នំសិខរេស្វរ និង​ភដ្រេស្វរ។ នៅថ្ងៃទី០៧ ខែកក្កដា ឆ្នាំ២០២៥នេះ ជាខួប ១៧ឆ្នាំ (៧ កក្កដា ២០០៨-៧ កក្កដា ២០២៥) ដែលមរតកវប្បធម៌ដ៏មានតម្លៃរបស់កម្ពុជាមួយនេះ ត្រូវបានដាក់បញ្ចូលជាសម្បត្តិបេតិកភណ្ឌរបស់ពិភព​លោក ក្នុង​កិច្ចប្រជុំលើកទី៣២ នៅទីក្រុងកេបិច ប្រទេសកាណាដា។

ប្រាសាទព្រះវិហារត្រូវបានពិភពលោកទទួលស្គាល់ថាស្ថិតក្នុងបូរណភាពដែនដីនៃព្រះរាជាណាចក្រកម្ពុជាយ៉ាងពិតប្រាកដ​ ក្រោយតុលារការយុត្តិធម៌អន្ដរជាតិ Internaltional Court of Justice (ICJ) បានប្រកាស​សាលក្រម​ជាផ្លូវការនៅថ្ងៃទី១៥ ខែមិថុនា ឆ្នាំ១៩៦២ ក្រោមព្រះរាជបូជនីយកិច្ចដ៏ឧត្តុងឧត្តមរបស់ព្រះ​បរមរតន​កោដ្ឋ នរោត្តម សីហនុ៕

​រូបភាព៖ មន្ទីរព៏ត៌មានខេត្តព្រះវិហារ