អត្ថបទ៖ កែវ រតនៈ

យោងតាមការផ្សព្វផ្សាយរបស់រដ្ឋបាលខេត្តតាកែវបានឱ្យដឹងថា ឯកឧត្តម វ៉ី សំណាង អភិបាលខេត្តតាកែវដែលទើបឡើងកាន់តំណែងថ្មីៗបានថ្លែងនៅចំពោះមុខ សមត្ថកិច្ច និងអាជ្ញាធរគ្រប់លំដាប់ថ្នាក់នៅក្នុងខេត្តថា ការដាក់ចេញបទបញ្ជាទម្លាក់ផ្ទាំងផ្សព្វផ្សាយពាណិជ្ជកម្មស្រាបៀរចោលនេះ ក្នុងគោលដៅចូលរួមលើកកម្ពស់សុខុមាលភាពរបស់ប្រជាពលរដ្ឋ ពិសេសទៅលើកុមារតែម្តងព្រោះវាអាចជះឥទ្ធិពលមិនល្អទៅដល់កុមារហើយអាចឈានទៅដល់ការផឹកគ្រឿងស្រវឹងទាំងនេះផងដែរ។

ឯកឧត្តម វ៉ី សំណាង បានជំរុញឱ្យភាគីពាក់ព័ន្ធ ជូនដំណឹងទៅដល់ក្រុមហ៊ុនស្រាបៀរលើដីសាធារណៈរបស់រដ្ឋទាំងអស់ដែលកំពុងតែដាក់ផ្ទាំងផ្សព្វផ្សាយពាណិជ្ជកម្មស្រាបៀររបស់ខ្លួនចោលទាំងអស់ ឬអាចប្តូរមកវិញនូវការលើកផ្ទាំងផ្សាយរបស់ខ្លួនដែលទាក់ទងនឹងសុខភាពប្រជាពលរដ្ឋ ខ្លឹមសារអប់រំល្អៗឬ ឬក៏ដាក់ផ្សាយជាទឹកសុទ្ធជំនួសវិញ។

លោក​  លី រដ្ឋា ប្រជាពលរដ្ឋរស់នៅក្នុងសង្កាត់រកាក្រៅ ក្រុងដូនកែវ ខេត្តតាកែវ ចាត់ទុកថាវិធានការហាមការផ្សព្វផ្សាយស្រាបៀរទៅទូទាំងខេត្តតាកែវនេះគឺជាកាដូដ៏ល្អសម្រាប់ប្រជាពលរដ្ឋក្នុងខេត្តតាកែវទាំងមូល ព្រោះលោកមើលឃើញថាគ្រោះថ្នាក់ដោយសារតែស្រានៅក្នុងខេត្តតាកែវកើតមានច្រើន ដូចនេះការហាមឃាត់នេះគឺជាផ្នែកមួយនេះការកាត់បន្ថយគ្រោះថ្នាក់ផងដែរ។ ជាមួយគ្នានេះ លោកសង្ឃឹមថា អភិបាលខេត្តដែលទើបឡើងថ្មីនេះនឹងនាំនូវអ្វីល្អៗបន្ថែមទៀតជូនដល់ដើម្បីលើកមុខមាត់ខេត្ត និងជាប្រយោជន៍ដល់ប្រជាពលរដ្ឋក្នុងខេត្តតាកែវ។

គួរបញ្ជាក់ថា ក្នុងឱកាសក្នុងពិធីប្រកាសចូលកាន់មុខតំណែងអភិបាល នៃគណៈអភិបាលខេត្តកំពង់ស្ពឺថ្មី កាលពីថ្ងៃពុធទី៣ ខែកក្កដា ឆ្នាំ២០២៤ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានកោតសរសើរ ឯកឧត្តម វ៉ី សំណាង ក្នុងនាមជាអតិតអភិបាលខេត្តកំពង់ស្ពឺដែលបានប្រែក្លាយខេត្តកំពង់ស្ពឺក្លាយជាខេត្តនាំមុខគេនៅគ្រប់រាជធានីខេត្តទាំងអស់ ដែលមិនឱ្យមានការផ្សព្វផ្សាយគ្រឿងស្រវឹងនៅក្នុងទូទាំងខេត្ត ៕