ក្រសួងកសិកម្ម និងដៃគូអភិវឌ្ឍ ចុះពិនិត្យ និងវាយតម្លៃការអនុវត្តគម្រោងគាំទ្រកសិករសហគមន៍ កសិកម្ម និងក្រុមហ៊ុនកសិកម្ម ក្នុងខេតចំនួន២

21-ឧសភា-2026 - ម៉ោង 10:10:AM

ដោយ៖ វិចិត្រ

ក្រសួងកសិកម្ម បានសហការជាមួយដៃគូអភិវឌ្ឍ ចុះពិនិត្យ និងវាយតម្លៃការអនុវត្តគម្រោងអភិវឌ្ឍន៍ ដើម្បីគាំទ្រកសិករ សហគមន៍កសិកម្ម និងក្រុមហ៊ុនកសិកម្ម ក្នុងខេត្តកំពង់ស្ពឺ និងកំពង់ធំ។ ក្នុងណើរចុះពិនិត្យនោះ ធ្វើឡើងរយៈពេល២ថ្ងៃ ដោយចាប់ពីថ្ងៃទី១៩ ដល់២០ ខែឧសភា ឆ្នាំ២០២៦។

បើតាមការផ្សព្វផ្សាយរបស់ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃព្រហស្បតិ៍នេះ នាដំណើរចុះពិនិត្យនោះ ក្រុមការងារបានវាយតម្លៃការផលិត និងការបញ្ចូលប្រើប្រាស់ធ្យូងអង្កាម (Biochar) ជី និងថ្នាំកសិកម្មដែលផ្សំពីធ្យូងអង្កាម ការដាំដុះដំណាំចង្ក្រង់ស្វា ដើម្បីកែលម្អគុណភាព ឬ ជីជាតិដី ការពិសោធន៍ប្រៀបធៀបប្រសិទ្ធភាពនៃការគ្រប់គ្រង និងថែទាំដំណាំ លើទិន្នផល និងគុណភាពគ្រាប់ស្រូវ និងគ្រាប់ស្វាយចន្ទី ហើយក្នុងនោះក៏រួមទាំងដំណើរការរបស់រោងសម្ងួតកសិផល និងម៉ាស៊ីនបូមទឹកដែលប្រើថាមពលព្រះអាទិត្យ។

ក្នុងនោះដែរ ក្រុមការងារក៏បានជួបជាមួយមន្ត្រីសាកលវិទ្យាល័យភូមិន្ទកសិកម្ម មន្ទីរកសិកម្មខេត្ត និងទីប្រឹក្សាដៃគូអភិវឌ្ឍ និងក្រុមហ៊ុន ដោយបានលើកអំពីគោលនយោបាយថ្មីរបស់រដ្ឋាភិបាលកម្ពុជា យុទ្ធសាស្ត្រ និងសកម្មភាពសំខាន់ៗរបស់ក្រសួងកសិកម្ម។

ជាមួយគ្នានោះក្រុមការងារបានផ្តល់ការណែនាំ ដើម្បីកែលម្អការផ្សព្វផ្សាយបញ្ចូល និងការប្រើប្រាស់បច្ចេកទេសខាងលើ សំដៅអភិវឌ្ឍវិស័យកសិកម្មជាតិ ពោលគឺធ្វើឱ្យកសិករ សហគមន៍កសិកម្ម និងក្រុមហ៊ុនកសិកម្មផលិតស្បៀងអាហារដែលមានតម្លៃសមរម្យ និងមានសុវត្ថិភាព កើនប្រាក់ចំណូល។

សម្រាប់ក្រសួងកសិកម្ម ការថែរក្សាធនធានធម្មជាតិកសិកម្ម ដូចជា ដី ទឹក និងព្រៃឈើ គឺជាការបង្កើនភាពធន់ និងបន្ថយការបង្កបញ្ហានានាដែលធ្វើឱ្យមានការប្រែប្រួលអាកាសធាតុជាដើម៕