ដោយ៖ វិចិត្រ

ក្រុមការងារអន្តរក្រសួង គណៈកម្មការសុរិយោដីថ្នាក់ជាតិ និងអាជ្ញាធរជាតិដោះស្រាយទំនាស់ដីធ្លី បាន​សម្រេច​​​បដិ​សេធសំណើសុំចុះបញ្ជីចេញបណ្ណកម្មសិទ្ធិដីមួយកន្លែង តាមការស្នើសុំរបស់ប្រជាពលរដ្ឋ ហើយ​​ថា ករណីនេះនឹងមិនត្រូវបានលើកយក​មកពិនិត្យ​ដោះស្រាយទៀតឡើយ។ នេះបើតាមលិខិត​ប្រកាស​ព័ត៌មាន​របស់ក្រសួងរៀបចំដែនដី នគរូបនីយកម្ម និងសំណង់ ចុះថ្ងៃទី១៥ ខែមិថុនា ឆ្នា២០២៦។

ប្រជាពលរដ្ឋចំនួន ១០នាក់ តំណាងប្រជាពលរដ្ឋ ចំនួន ១៥៥គ្រួសារ កាលពីពេលកន្លងទៅបាន​ដាក់​សំណើ ស្នើសុំចុះបញ្ជីចេញបណ្ណកម្មសិទ្ធិដីមួយកន្លែង ទំហំ ៣២២,៣២ហិកតា ស្ថិតក្នុងតំបន់៣មុំ ដែលស្ថិតនៅភូមិគោកត្របែក ឃុំស្រឡៅ និងភូមិឈូក ឃុំទ្រៀល ស្រុកតាំងគោក ខេត្តកំពង់ធំ។

នៅក្នុងលិខិតប្រកាសព័ត៌មានខាងលើបានបញ្ជាក់ថា ក្រោយទទួលបានសំណើពីប្រជាពលទាំង១៥៥​គ្រួសារ​រួចមក អាជ្ញាធរ​ពាក់​ព័ន្ធ បានចុះពិនិត្យ វាស់វែង និងបានតម្លើងផែនទីទីតាំងដីស្នើសុំខាងលើនេះ ជាលទ្ធផល ឃើញថា ទីតាំង​ដីស្នើសុំ មានទំហំសរុប ៣២២,៣២ហិកតា ស្ថិតក្នុងតំបន់អាងទឹក៣មុំ ក្នុងនោះ ផ្ទៃដីទំហំ ១៤០,២៧​ហិកតា ស្ថិតនៅផ្នែកខាងលិចនៃអាងទឹក និងផ្ទៃដីទំហំ ១៨១, ៩៦ហិកតា ស្ថិតនៅផ្នែក​ខាង​កើត​នៃ​អាង​ទឹក មានទីតាំងស្ថិតនៅ ភូមិគោកត្របែក ឃុំស្រឡៅ និងភូមិឈូក ឃុំទ្រៀល ស្រុកតាំងគោក ខេត្តកំពង់ធំ ជា​ទីតាំងដីស្ថិតនៅក្នុងតំបន់៣ នៃតំបន់បឹងទន្លេសាប ដែលជាតំបន់ស្នូល និងជាតំបន់ព្រៃលិច​ទឹក​បឹង​ទន្លេ​សាប ដែលត្រូវធ្វើការអភិរក្សយ៉ាងតឹងរឹងបំផុត និងជាតំបន់អភិរក្ស​សត្វ​ខ្សឹប ដែលពុំត្រូវបានអនុញ្ញាតឱ្យ​ចុះ​បញ្ជី​ចេញបណ្ណកម្មសិទ្ធិជូនបានឡើយ៕