ដោយ៖ កែវ រតនៈ

ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម  រុក្ខាប្រមាញ់ និងនេសាទ បានប្រាប់បៃតងប៉ុស្តិ៍តាមបណ្ដាញសង្គមតេឡេក្រាមថា រដូវបិទនេសាទ គឺចាប់ពីថ្ងៃទី​១ ខែមិថុនា ដល់ថ្ងៃទី៣០ ខែកញ្ញា ចំពោះ​តំបន់គ្រប់គ្រងជលផលទឹក​សាប​ដែលស្ថិត​នៅ ខាងជើង​ខ្សែស្រប​ទន្លេ​ចតុម្មុខ។ ចាប់​ពីថ្ងៃទី​១ ខែកក្កដា ដល់​ថ្ងៃទី៣១ ខែតុលា ចំពោះ​​តំបន់គ្រប់គ្រងជលផលទឹក​សាប​ដែលស្ថិត​នៅ ខាងត្បូង​ខ្សែស្រប​ទន្លេ​ចតុម្មុខ។

ឯកឧត្តមបន្ថែមថា​ រដូវបិទនេសាទ ប្រជាពលរដ្ឋក៏ដូចជាប្រជានេសាទ អាចនេសាទបានដោយប្រើឧបករណ៍នេសាទខ្នាតតូច (គ្រួសារ) លើកលែងតែកន្លែងអភិរក្សដែលហាមធ្វើនេសាទគ្រប់ពេលវេលា​និងឧបករណ៍នេសាទគ្រប់ប្រភេទ។ ហើយការធ្វើនេសាទខ្នាតតូច (គ្រួសារ) មិនតម្រូវឱ្យមានលិខិតអនុញ្ញាតធ្វើនេសាទនោះទេ ​។

ដោយឡែករដូវបើកនេសាទ គឺចាប់ពីថ្ងៃទី១ តុលា ដល់ថ្ងៃទី៣១ ឧសភា ចំពោះតំបន់គ្រប់គ្រងជលផលទឹក​សាប​ដែលស្ថិតនៅខាងជើងខ្សែស្របទន្លេចតុម្មុខ ។ ចាប់ពីថ្ងៃទី១ វិច្ឆិកា ដល់ថ្ងៃទី៣០ មិថុនា ចំពោះតំបន់គ្រប់គ្រងជលផលទឹកសាបដែលស្ថិតនៅខាងត្បូងខ្សែស្របទន្លេចតុម្មុខ។​

ច្បាប់ស្តីពីជលផលដែលបានកំណត់ឱ្យមានរដូវបិទនិងរដូវបើកនេសាទ គឺដើម្បីរក្សានិរន្តរភាពនៃធនធានជលផល។ ការខិតខំប្រឹងប្រែងចូលរួមនិងអនុវត្តច្បាប់នាំឱ្យផលនេសាទទឹកសាបមានការកើ នឡើងគួជាទីមោទនៈនេះ នាំឱ្យមហាជនមានការអបអរសាទរ និងសប្បាយរីករាយ។ មច្ឆជាតិដែលកើនឡើងនេះ គឺដោយមានការចូលរួម ថែរក្សា ការពារ អភិរក្ស ទប់ស្កាត់និងបង្រ្កាបបទល្មើសជលផលពីសមត្ថកិច្ចជំនាញជលផល កងកម្លាំងប្រដាប់អាវុធ រដ្ឋបាលថ្នាក់ក្រោមជាតិ សមត្ថកិច្ចពាក់ព័ន្ធ និងសហគមន៍នេសាទ ព្រមទាំងមានការចូលរួមផ្តល់ព័ត៌មានពីអ្នកសារព័ត៌មានក៍ដូចជាអ្នកពាក់ព័ន្ធផងដែរ។

រដូវបិទនេសាទមិនប៉ះពាល់ដល់អ្នកនេសាទនោះទេ ប្រជានេសាទនៅតែអាចធ្វើនេសាទដោយឧបករណ៍នេ​សាទ​ខ្នាតតូច(គ្រួសារ)ស្របតាមច្បាប់ស្តីពីជលផល។​ ផ្ទុយទៅវិញរដូវបិទនេសាទនាំឱ្យរក្សាបាននូវផលស្តុកមច្ឆជាតិនិងមានការកើនឡើងជាបន្តបន្ទាប់។

បើតាម លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឱ្យបញ្ជាក់ឱ្យដឹងថា ផលត្រីមានការកើនឡើងជាងឆ្នាំមុនប្រមាណ​ ១០%​ក្នុងឆ្នាំ២០២៥ ហើយធៀបនឹងឆ្នាំ២០២៤ ដោយសារការសហការចូលរួមគ្រប់ភាគីពាក់ព័ន្ធ​ ក្នុងការការបង្ក្រាបបទល្មើសនេសាទ ប្រកបដោយភាពម៉ឺងម៉ាត់ ច្បាស់លាស់ និងមានប្រសិទ្ធភាពខ្ពស់៕